Pa January 19, 2021, Khoti ku Turkmenistan likati Mubali Ihlosbek Rozmetov wali na mulandu. Wakeruzgika kuti wakagwire jele vyaka viŵiri, chifukwa cha kukana kunjira usilikari chifukwa cha njuŵi yake. Aka nkhachiŵiri kugwira jele chifukwa chakukana kunjira usilikari.

Ihlosbek Rozmetov

• Chaka chakubabikira: 1997 (ku Andalib)

• Mbiri yake: Mu banja lakwawo ŵali kubabikamo ŵatatu. Ndipo apo wakaŵa na vyaka 10, para wawera ku sukulu wakagwiranga maganyu kuti wawovwire banja lakwake. Wakutemwa kuchita maseŵero ghakupambanapambana, kuŵerenga, na kutegherezga sumu. Amama ŵake ŵakamba kusambira Baibolo mu 2010, ndipo nayo wakamba kusambira pati pajumpha chaka chimoza

Pa July 11, 2018, apo Mubali Ihlosbek Rozmetov wakaŵa na vyaka 20, khoti likagamura kuti wakagwire jele ku Seydi chaka chimoza chifukwa chakukana kunjira usilikari chifukwa cha njuŵi yake. Pamanyuma ŵakamufumiska wati wamalizga kugwira jele chaka chimoza. Kuyana na dango la charu ichi, munthu ŵangamujalira mu jele kaŵiri chifukwa chakukana kunjira usilikari chifukwa cha njuŵi yake.

Pa November 25, 2020, Mubali Ihlosbek wakachemekaso kuti wakanjire usilikari. Iyo wakaŵalongosolera mwantchindi vigomezgo vyake pa nkhani iyi. Kweni ŵalara ŵa boma ŵakamukakiska ndipo khoti likadumura kuti ŵakagwire jele vyaka viŵiri chifukwa chakuti wakakanaso kunjira usilikari chifukwa cha njuŵi yake.

Mubali Ihlosbek wakayowoya kuti umoyo ukawa “wakusuzga chomene” apo ŵakamujalira mu jele kakwamba. Kweni mavesi gha mu Baibolo agho wakaŵerenga na kughasunga pa mtima pambere ŵandamujalire mu jele, ghakamovwira chomene kuti wazizipizge. Iyo wakaghanaghanirangapo lemba la Ŵafilipi 4:6, 7, ndipo likamovwira chomene. Ndipo mavesi agha ghakamovwiranga kukumbuka kuti waleke “kwenjerwa na chinthu chilichose,” walombenge “mtende wa Chiuta,” kweniso kuti waleke kufipa mtima chomene pa nyengo yakusuzga iyi. Mubali Ihlosbek wakayowoya kuti: “Pa nyengo yakusuzga iyi, nkhalombanga kwa Yehova pafupipafupi ndipo nkhajipulikanga kuti wali nane pafupi.”

Tikugomezga kuti Yehova walutilirenge kumukhozga Mubali Ihlosbek na wose awo wakugomezga Iyo.—Yesaya 40:29-31.