Pa January 18, 2021, khoti linyake ku Turkmenistan likati Mubali Maksat Jumadurdyyev wali na mulandu. Ŵakamupimira vyaka viŵiri kuti wakagwire jele chifukwa cha kukana kunjira usilikari chifukwa cha njuŵi yake.

Maksat Jumadurdyyev

• Chaka chakubabikira: 2000 (ku Seydi, Chigaŵa cha Lebap)

• Mbiri yake: Wali na ŵadumbu ŵake ŵaŵiri. Ni munyamata wankharo yiwemi. Wakutemwa kuchita maseŵero. Wali na luso pakujambura na kupenta vithuzi. Mu chikaya chakwake ŵanthu ŵakumumanya kuti ni munthu wakujiyuyura, munenesko, kweniso wakulimbikira ntchito

  Wakamba kusambira Baibolo mu 2018. Ndipo wakabatizika mu 2019. Ni yekha Kaboni wa Yehova mu banja lakwake

Mubali Maksat Jumadurdyyev wali kukhalamo kale mu jele chaka chimoza chifukwa cha kukana usilikari. Wakafumiskika pa July 17, 2019. Pakuti ku Turkmenistan munthu uyo wakana usilikari pa vifukwa vya chisopa wangakakika kaŵiri, ntheura ŵakamuchemaso ku usilikari mu March 2020. Iyo wakalemba kalata yakulongosora vya kukana kunjira usilikari, uku wakumanya kuti ŵangakamujaliraso mu jele.

Ŵati ŵamufumba mafumbo ghanandi kweniso kumutolera kwa dokotala kuti wakamupime, pa December 30, 2020, Maksat wakaphalirika kuti ŵamujulirengeso mulandu unyake. Ndipo Ŵakamupoka pasipoti yake.

Pakwamba apo ŵakamweruzganga na kumujalira mu jele vikaŵa makora viŵi yayi. Maksat wakuti: “Apo ŵakalutanga nane ku jele mu 2018, chinthu chakusuzga chomene chikaŵa kulekana na ŵapapi ŵane. . . . Pakuti ŵapapi ŵane Mbakaboni yayi, iwo ŵakati usange nakana usilikari, ŵangakolerana nane yayi.”

Maksat wakulongosora kuti: “Mazgu gha pa Mariko 10:29, 30 ghakanovwira kuzizipizga nkhati nalekana na banja lakwithu kweniso ŵabwezi. Yesu wakayowoya kuti usange tataya chinthu chinyake chifukwa cha iyo kweniso chifukwa cha makani ghawemi, tizamupokera vinandi vyakujumpha handiredi.”

Pa nyengo iyo wakaŵira mu jele, Maksat wakajiwoneranga yekha kanandi waka umo Yehova wakazgoleranga malurombo ghake mwaluŵiro na kumuthaska ku masuzgo. Kanandi Maksat wakakumbukanga mazgu gha pa Joshuwa 1:9, apo pakuti: “Khwima mtima na kuŵa wankhongono. Ungatenthemanga yayi panji kopa, chifukwa Yehova Chiuta wako wali nawe kulikose uko ukuya.”

Pambere wanderuzgike kachiŵiri, Maksat wakayowoya kuti wangalekapo yayi kupulikira njuŵi yake yakusambizgika Baibolo. Iyo wakati: “Nanga ŵanganijalira mu jele kachiŵiri, nkhugomezga kuti Yehova wanovwirenge kwali vinthu vingaŵa wuli. Fundo ya pa Ŵafilipi 4:6, 7 yikunovwira kuŵa na chikanga kweniso kuti mtima uŵe m’malo.”

Tikulutilira kulombera mubali withu Maksat, kweniso ŵabali ŵanyake ŵachinyamata awo ŵakuchita chikanga kukhozgera muwuso wa Yehova. Tili na chigomezgo chose kuti Yehova watumbikenge kugomezgeka kwa ŵabali ŵithu awo ŵali mu jele.—Chivumbuzi 2:10.