Pa February 10, 2021, khoti ku Turkmenistan likeruzga kuti Mubali Nazar Alliyev wali na mulandu ndipo wakagwire jele chaka chimoza chifukwa cha kukana kunjira usilikari chifukwa cha njuŵi yake

Nazar Alliyev

• Chaka cha kubabikira: 2000 (ku Chigaŵa cha Lebap)

• Mbiri yake: Wakukhala ku Türkmenabat na amama ŵake, mukulu wake kweniso mdumbu wake. Wakutemwa kuseŵera volleyball na bola la malundi. Ŵali kumusanga na masuzgo ghaŵiri gha mtima. Wakugwira ntchito yakumeta kuti wawovwire banja lakwake

  Wakasambira kutemwa fundo za mu Baibolo kufuma kwa amama ŵake. Wakabatizika mu 2015 apo wakaŵa na vyaka 14. Wakumanyikwa kuti ni munyamata wakuchezgeka, wakupa, kweniso wakujiyuyura. Banja lakwake ndakukondwa chifukwa cha ivyo wasankha

Pa May 16, 2020, Mubali Nazar Alliyev ŵakamutora na kuluta nayo ku ofesi ya kulembeskerako usilikari. Ŵalara ŵa ŵasilikari ŵakamuchichizga kuti wavware yunifomu ya usilikari, kulongora kuti wanjira usilikari, kweni wakakana. Pa May 28, Mubali Nazar wakasanganaso na ŵalara ŵa boma ndipo ŵakamuchichizga kuti wanjire usilikari, kweni wakakanaso. Ndipo mu mwezi wakulondezgapo, Mubali Nazar wakalembera kalata ŵalara ŵa ku ofesi yakulemba ŵanthu usilikari, ndipo wakaŵalongosolera ivyo wakugomezga pa nkhani ya chisopa.

Pa January 4, 2021, Mubali Nazar na amama ŵake ŵakaluta ku ofesi ya wakwimira boma pa milandu mu boma la Khojambaz. Mubali Nazar wakalongosora chifukwa icho wakukanira kunjira usilikari ndipo wakapempha kuti ŵamupe ntchito zinyake izo wangagwira. Nangauli Mubali Nazar wakachita vyose ivi, kweni awo ŵakafufuzanga mulandu uwu ŵakati ŵalara ŵa boma ŵamupenge mulandu nipera.

Mubali Nazar pasono wali na vyaka 20, ndipo wakati: “Para wamunthu ukugomezga chomene Yehova pa nyengo za nthena izi, wakukupa mtende wa mu mtima. Na wovwiri wa Yehova ungalongosora vya chigomezgo chako uku mtima uli m’malo.”

Iyo wakayowoyaso kuti: “Para nkhukumbuka ivyo vyanichitikira pa umoyo wane, nkhuwona kuti Yehova ndiyo wanovwiranga. Ivi vikunovwira waka kumanya kuti wanovwirengeso kunthazi uku.”

Charu cha Turkmenistan chikupeleka yayi ntchito zinyake padera pa usilikari. Ivi vikupangiska kuti ŵabali ŵachinyamata awo ŵakana kunjira usilikari chifukwa cha njuŵi yawo, ŵagwirenge jele vyaka viŵiri. Pasono ŵabali ŵachinyamata 15 ku Turkmenistan ŵali mu jele chifukwa chakukana kunjira usilikari.

Tikumanya kuti Yehova walutilirenge ‘kuchita nayo mwakugomezgeka’ Mubali Nazar kweniso ŵabali ŵanyake ku Turkmenistan.—Salimo 18:25.