Mubali David Petrosov uyo wali na vyaka 19, wakukhala ku Turkmenistan. Nangauli wachali muwukirano, kweni wakakumana na chiyezgo chikuru chomene: ŵakamujalira mu jele chaka chimoza chifukwa njuŵi yake yikumuzomerezga yayi kunjira usilikari. Ŵakamufumiska mu jele pa September 30, 2020.

Mubali Petrosov wakayowoya kuti: “Apo nkhaŵa mu jele, mazuŵa ghanyake nkhaŵanga wachitima. Kweni Yehova wakanipembuzganga kwizira mu Mazgu ghake. Para nakumbuka kuti Yehova wakumanya umo nkhujipulikira ndipo ngwakunozgeka kunikhozga, nkhongono zikakweranga ndipo nkhamulombanga. Pali mavesi ghanandi chomene agho ghakanovwira, kweni ilo nkhalikumbukanga chomene nda Ŵafilipi 4:13.”

Mubali Petrosov wakababikira ku Ashgabat, uwo ni msumba ukuru wa charu cha Turkmenistan. Apo wakakuranga, wakasambira kulizga gitara mwaluso. Wakutemwa kwata sumu, kuseŵera bola, kukwera mapiri, na kushuwa.

Munyake wa ku sukulu ndiyo wakamusambizga Baibolo, ndipo mu 2019 wakabatizika na kuŵa Kaboni wa Yehova. Nangauli ŵabali ŵake ŵa David Mbakaboni ŵa Yehova yayi, kweni ŵakuchindika chomene ivyo wakugomezga.

Pati pajumpha nyengo yichoko waka wati wabatizika, David ŵakamutolera ku khoti chifukwa chakuti wakakana kunjira usilikari. Charu cha Turkmenistan chikupeleka ntchito zinyake yayi ku awo ŵakana kunjira usilikari. Lekani mubali withu ŵakamweruzga kuti wakagwire jele chaka chimoza.

Nyengo yose iyo Mubali Petrosov wakaŵira mu jele, Yehova wakamovwiranga pa vinthu ivyo wakakhumbikwiranga. Mubali Petrosov wakati: “Apo nkhaŵa mu jele, ŵabali na ŵadumbu awo ŵakatondekanga kwiza kuzakaniwona, ŵakatumizganga waka amama kuti ŵazakanitawuzge. Ŵakaniphaliranga kuti ŵabali na ŵadumbu, ŵakulutilira kunilombera. Ivi vikanikondweskanga chomene.”

Kuyana na dango la charu cha Turkmenistan, David wakumanya makora kuti wangachemekaso kachiŵiri kuti wakanjire usilikari. Para ndimo vingaŵira, ŵangamukaka na kumweruzga kuti wakakhale vyaka vinandi ku jele.

David wakuti: “Nga umo vingaŵira na waliyose, ningatemwa yayi kuweleraso ku jele. Kweni nkhuchita wofi yayi. Ndine wachikanga chifukwa cha chipulikano icho nili nacho mwa Yehova, ŵabali na ŵadumbu, kweniso sumu zithu za Ufumu.”

Tili na chigomezgo chose kuti Yehova wamovwirenge mubali David kuti walutilire kuŵa na chikanga kweniso chipulikano. Tikulomberaso ŵabali ŵithu 10 awo nawo ŵachali mu jele ku Turkmenistan chifukwa chakuti njuŵi zawo zikuŵazomerezga yayi kunjira usilikari. Tikumanya kuti Yehova wakuŵatemwa, wakuŵakumbuka, kweniso wakuŵawovwira.—Salimo 69:33.