Pa March 16, 2021, khoti la ku Turkmenistan likapeleka chigamuro chake pa mulandu wa Mubali Rasul Rozbayev. Likati wakagwire jele vyaka viŵiri chifukwa cha kukana kunjira usilikari chifukwa cha njuŵi yake. Aka nkhachiŵiri kuti ŵamupe mulandu chifukwa cha kukana kunjira usilikari.

Rasul Rozbayev

• Chaka cha kubabikira: 1999 (Khallang)

• Mbiri yake: Wali na ŵadumbu ŵake ŵalara ŵaŵiri na munung’una wake yumoza. Wakati wamalizga sukulu ya sekondare, wakamba kusambira vya ntchito ya kumeta. Wakutemwa kuseŵera bola la malundi, volleyball, kweniso kushuwa

  Ŵapapi ŵake ŵakaŵa Ŵakaboni ŵa Yehova apo iyo wakaŵa wachali muchoko. Wakabatizika mu 2013

Mubali Rasul Rozbayev wakapika mulandu kakwamba chifukwa cha kukana kunjira usilikari pa December 19, 2017. Wakapika chilango chakuti wagwire kwa vyaka viŵiri. Ŵakamutuma kuti walime munda, wapande tirigu, na kupeleka 20 peresenti ya ivyo wakolora ku boma. Munda uwu ukaŵa kutali chomene na uko wakakhalanga. Pakuti wakaŵavya chakwendapo, wakendanga waka wapasi.

Kuyana na dango la ku Turkmenistan, munthu uyo wakana kunjira usilikari chifukwa cha njuŵi yake wangapikaso mulandu kachiŵiri. Pa April 22, 2020, wakalutaso ku ofesi ya ŵasilikari na kuŵaphalira vifukwa ivyo wakukanira kunjira usilikari. Ivi vikati vyachitika, kwa myezi yinandi wakalutanga kukawonekera ku ofesi ya ŵasilikari, uko ŵakamufumbanga mafumbo, ŵadokotala ŵakamupimanga, kweniso ŵakamuphaliranga kuti wamujalirika mu jele para wakukana kunjira usilikari. Pa January 22, 2021, mulandu wake ŵakawulutiska ku ŵakwimira boma pa milandu.

Chiyelezgero chiwemi cha ŵabali na ŵadumbu awo nawo ŵakusangana na masuzgo ghakuyana waka, chikumovwira Rasul kuti waŵe na chikanga. Iyo wakuti: “Chiyelezgero chawo chikunovwira kuti nithembenge Yehova . . . kweniso kuti niŵe na nkhongono. Para nalutilira kuŵa wakugomezgeka, nikondweskenge Yehova kweniso Yesu.” Ivyo vyachitikira mubali uyu, ntchiyezgo ku mbumba yakwake yose. Amama ŵake ŵakulongosora ivyo vikuŵakhozga mu nyengo yakusuzga iyi, ŵakuti: “Baibolo kweniso mavidiyo ghithu, vikunovwira kumanya kuti ndine pera yayi nkhusangana na viyezgo vyanthena ivi. Ŵabali na ŵadumbu ŵanyake nawo ŵakujumpha mu viyezgo vyakuyana waka, ndipo ŵakutonda. Viyelezgero vyawo vikunovwira kuti nilutilire kuzizipizga.”

Rasul wakukhozgeka chomene na mazgu gha pa Salimo 37:23, 24. Na wovwiri wa Yehova, tikumanya kuti mubali uyu na ŵabali ŵanyake ŵachinyamata, ŵalutilirenge kuŵa ŵachikanga, ŵa chipulikano chakukhora, ŵakugomezgeka, kweniso ŵakukondwa.