Sonosono apa, a khoti la Ŵasilikari ku Turkmenistan lipelekenge chigamuro chake pa mulandu wa Mubali Ruslan Artykmyradov. Wangazakapika chilango chakuti wagwire jele vyaka viŵiri chifukwa chakukana usilikari chifukwa cha njuŵi yake. Ŵamusunga mu selo kufuma waka pa December 15, 2020. Aka nkhachiŵiri kuti wazakeruzgike na khoti chifukwa cha kuleka kunjilirapo pa vya charu.

Ruslan Artykmyradov

• Chaka cha kubabikira: 2000 (mu muzi wa Alpan Gengeshlik)

• Mbiri yake: Wakakulira ku chigaŵa cha ku mizi. Wakagwiranga ntchito ya umakanika. Wakaŵa mwana muwemi ku sukulu kweniso wakutemwa kuseŵera bola

  Wakasambira kulondezga fundo za mu Baibolo kufuma kwa amama ŵake. Wakakhorwa wati wawona umo Ŵakaboni ŵa Yehova ŵakutemwerana na kukolerana, ndipo wakabatizika mu 2015 apo wakaŵa na vyaka 15. Iyo wakukana kunjira usilikari chifukwa chakuti wakutemwa Yehova.

Pa August 13, 2018, Mubali Ruslan Artykmyradov, uyo panyengo iyo wakaŵa na vyaka 18, wakeruzgika kuti wakagwire jele chaka chimoza chifukwa chakukana kunjira usilikari. Ŵakamufumiska mu jele pa August 12, 2019, wati wagwira jele chaka chimoza.

Kuyana na malango gha ku Turkmenistan, ŵanalume ŵangeruzgika maulendo ghaŵiri kuti ŵakagwire jele chifukwa chakukana kunjira usilikari. Lekani mu November 2020, Ruslan wakachemekaso kuti wakanjire usilikari.

Apa napo Mubali Ruslan wakakana kunjira usilikari nangauli wakamanyanga kuti wangeruzgika kuti wakagwireso jele kachiŵiri. Pa December 15, 2020, ŵakamukaka na kumusunga dankha mu jele kulindilira kuti mulandu wake weruzgike.

Mubali Ruslan waŵikapo mtima kulutilira kuŵa wakugomezgeka kwa Yehova. Pakuyowoya vya umo vikaŵira apo ŵakamweruzganga pakwamba, iyo wakuti: “Nkhafipanga mtima yayi nangauli nkhamanyanga kuti yiŵenge nkhani yakusuzga ndipo ningeruzgika mwambura urunji. Kweni chimwemwe chane na ubwezi wane na Yehova ningavisinthaniska na chilichose yayi.”

Umoyo uwo Mubali Ruslan wakakhalanga mu jele ukaŵa wakusuzga chomene. Vinthu vikaŵa makora yayi, ndipo kanandi ŵakamuchitiranga nkhaza. Kweni nyengo zose wakawonanga kuti Yehova wakumovwira. Ruslan wakuti: “Apo nkhaŵa mu jele, kanandi nkhawonanga woko la Yehova. Mwachiyelezgero, nkhawonanga woko la Yehova para munthu munyake wamba kunitimba. Para ŵakwamba waka kunitimba vikaŵinyanga chomene, kweni para ŵalutizga kunitimba nkhapulikanga kuŵinya yayi.” Chinyake ntchakuti, wovwiri uwo ŵabali na ŵadumbu ŵakamupanga ukamukhozganga chomene kweniso ukaŵa ukaboni wankhongono ku ŵanthu awo ŵakawonanga mu jele.

Nangauli Mubali Ruslan ŵangamujaliraso mu jele, kweni wali na chigomezgo chose kuti Yehova wamovwirenge, iyo wakuti: “Nili na chigomezgo chose kuti Yehova wazamunitumbika. . . . Para wamunthu uli na chipulikano chakukhora, ukuŵa wakukondwa chomene, ndipo para ndiwe wakukondwa vikovwira kuti uŵe wankhongono na kuzizipizga masuzgo. Ndipo munthu wankhongono wangathera yayi.”

Tikuwonga chomene chifukwa cha chiyelezgero cha Mubali Ruslan, kweniso ŵachinyamata ŵanyake ŵachikanga, awo ŵapeleka ukaboni wakuti Yehova watovwirenge kuŵa na chikanga kweniso chimwemwe para tasangana na viyezgo. Ndipo tikumanya kuti kugomezgeka kwawo ku Ufumu wa Chiuta kuwenge pawaka yayi.—Ŵahebere 11:6.