Mubali Selim Taganov wali kufumiskika mu jele pa October 3, 2020, ndipo wakati: “Nkhati namulomba Yehova, iyo wakanovwira kuti mtima uŵe m’malo.” Selim wali na vyaka 19, kweni wakhalamo kale mu jele chaka chimoza chifukwa cha kukana usilikari pakulondezga njuŵi yake.

Selim wakababikira ku Ashgabat, msumba ukuru wa Turkmenistan. Apo wakaŵa mwana, wakachitanga makora mu kilasi ndipo wakamba kutemwa vyakwimbakwimba. Selim wakulemba sumu, kwimba, na kulizga gitara. Ŵapapi ŵake, ŵabali ŵaŵiri, na ŵabwezi ŵakalongosora kuti Selim ni munthu walusungu, wakuzikira, na wakukondwa. Pambere ŵandamweruzge kuti wali na mulandu, loya wa Selim uyo khoti likamupa wakati: “Ni munyamata muwemi, wakuyowoya unenesko, nakuti wakukhweŵa yayi panji kumwa chomene moŵa, ndipo wamalizga waka sekondare. Para wangajalirika mu jele, umoyo wake wamunangika waka.”

Umoyo ukaŵa wakusuzga nadi mu jele. Kweni Selim wakuti: “Pa nyengo iyo nkhaŵa mu jele, ubwezi wane na Yehova ukakhora. Nkhakumbuka fundo za mu Baibolo izo nkhasambira nichali ku nyumba, ndipo nkhamba kuzipulikiska chomene. Nkhakhozgekaso pakukumbuka malemba nga ni Yesaya 41:10, 11.

“Ku malo agho ŵakanisungako pakwamba pambere ŵandanitume ku jele, kukaŵa kwakusuzga chifukwa kukaŵavya munthu wakuti niyowoye nayo na kumuphalirako vya mu mtima. Kweni nkhalomba Yehova kuti wanovwire. Pamanyuma, ŵakayidi na ŵalinda ŵa jele awo pakwamba ŵakaŵa ŵakali kweniso ŵakanofyanga ŵakamba kunovwira na kunikhwimiska wuwo. Vyose ivi vikanikhorweska kuti Yehova wali nane.”

Chinyake icho chikamukhozganga Selim, mbabali na ŵadumbu. Iyo wakuti: “Apo nkhaŵa mu jele, ŵanandi ŵakanitumiranga monile na kuniphalirako fundo zakukhozga. Nkhayezgayezga kusungilira pamtima fundo izi, ndipo nkhaziyowoyanga mwakuwerezgawerezga. Ivi vikanikhozganga na kunisanguluska.”

Kuyana na dango la ku Turkmenistan, Selim ŵangamuchemaso kuti wakanjire usilikari. Usange ndivyo vingachitika, Selim wakumanyirathu kuti sono ŵangakamupimira vyaka vinandi kuti wakakhale mu jele. Selim wakuti: “Pakuti Yehova wanovwira kutchintha pa chiyezgo ichi, sono nkhopaso yayi. Nili na chikanga kweniso chigomezgo pakumanya kuti Yehova wali nane.”

Tose tikumanya kuti nyengo yinyake tikumanenge na viyezgo. Selim wakutichiska kuti: “Awo ŵangakumana na viyezgo vyakuyana waka, ŵakumbukenge mazgu gha pa Yesaya 30:15: ‘Musangenge nkhongono chifukwa cha kukhala mwakufwasa na kugomezga.’”