Mubali Eziz Atabayev ku Turkmenistan wazizipizga mwakugomezgeka kwa vyaka viŵiri ivyo wakapika chifukwa chakukana kunjira usilikari chifukwa cha njuŵi yake. Ŵakamufumiska mu jele pa December 19, 2020. Kwa vyaka 10 ivyo vyajumpha, ŵabali ŵithu 46 ŵa mu charu ichi ŵajalirika mu jele chifukwa chakukana kunjira usilikari.

Mubali Atabayev ŵakamuchema kuti wakanjire usilikari mu 2016. Iyo wakakana kunjira usilikari chifukwa cha njuŵi yake. Pamanyuma mulandu wake ŵakaluta nawo kwa wakwimira boma pa milandu. Pati pajumpha vyaka pafupifupi viŵiri, Eziz ŵakaluta nayo ku khoti kuti ŵakategherezge mulandu wake. Pa December 19, 2018, khoti likeruzga kuti wakagwire jele vyaka viŵiri.

Eziz wakuti: “Pambere ŵandanijalire mu jele, nkhatemwanga kuchezga na ŵabali awo ŵakatondapo suzgo ili panji awo ŵali kugwirapo kale jele. Nkhaŵazganga nkhani zakupambanapambana zakulongosora umoyo wa munthu izo zikusangika mu mabuku ghithu. Nkhaŵazgangaso fundo zakukhozga za mu Baibolo.

“Mulenji wa zuŵa ilo nkheruzgikiranga, mubali munyake wakanilongora lemba la Yesaya 30:15, ilo likuti: ‘Musangenge nkhongono chifukwa cha kukhala mwakufwasa na kugomezga.’ Vesi ili nyengo zose likunovwira kuti mtima uŵe m’malo na kugomezga Yehova pa chilichose. Kughanaghanirapo pa vesi ili kukanovwira chomene panyengo yose iyo nkhaŵira mu jele.”

Nangauli umoyo wa ku jele ukaŵa wakusuzga, kweni suzgo likuru kwa Eziz likaŵa lakuti wakatalikirana na ŵa mu mbumba yakwake. Iyo wakuti, “Mu jele, nkhaŵa paubwezi na ŵabali ŵane ŵauzimu awo tikaŵira lumoza mu jele. Ŵakaŵa ŵabwezi ŵane ŵanadi ndipo ŵakanovwira kuzizipizga suzgo lane lakuti nkhaŵasoŵa ŵabali na ŵabwezi ŵane.”

Eziz wakaŵaso na mwaŵi wakupharazga. Iyo wakuti: “Pakwamba, ŵakayidi ŵanyake ŵakasuskanga chomene para nkhuphalirako ŵanji ivyo nkhugomezga. Ndipouli, nyengo yati yajumphapo, awo ŵakasuskanga ŵakamba kutegherezga. Para kwiza ŵakayidi ŵanyake awo ŵakanimanyanga yayi, nawoso ŵakasuskanga para nkhupharazga. Ndipouli awo nkhaŵa kuti nawapharazgirapo kale, ŵakaniŵikiranga kumanyuma ndipo ŵakaphalirangakoso ŵanyawo awo ŵiza sono ivyo ŵakasambira.”

Kuti tinozgekere viyezgo ivyo vingiza munthazi, Eziz wakuti: “Nkhumuchiskani kuti muŵikepo mtima kusambira pamwekha kweniso kuyowoya na Yehova mwakufwatuka mu lurombo. Mukwenera kumuphalira chilichose, kwali ni umo mukujipulikira panji vinthu ivyo vikumufipiskani mtima. Mukwenera kumuphalira chilichose Yehova.”

“Natonda chiyezgo ichi na wovwiri wa Yehova. Nili na chigomezgo chose kuti Yehova walutilirenge kunovwira. Nkhopa yayi viyezgo ivyo vikwiza munthazi.”—Salimo 118:6.