Pa February 24, 2022, Boma la Russia likawukira charu cha Ukraine. Ku Ukraine kuli Ŵakaboni ŵa Yehova ŵakujumpha 129,000 pamoza na ŵana ŵawo. Ofesi ya Munthavi yasora Makomiti Ghakovwira Para Kwachitika Soka 27 kuti ghapelekenge wovwiri ku ŵabali na ŵadumbu ŵithu. Padera pakulongorana chitemwa cha Chikhristu, ŵabali na ŵadumbu ŵithu ŵakuŵikapo mtima kovwirana kweniso kovwira ŵazengezgani ŵawo mu nyengo zakusuzga izi.

Apo ŵabali na ŵadumbu ŵanandi ŵachali mu charu chenechichi, ŵanyake ŵali kusankha ŵekha kuti ŵasamuke. Awo ŵali kusankha kusamuka ŵakakhala pa mizere yitaliyitali panji pafupifupi makilomita 30, ndipo ŵakalindilira kwa mazuŵa ghatatu panji ghanayi kuti ŵasayiniske vikalata vyakwendera. Ŵapharazgi ŵakapenja ŵasopi ŵanyawo awo ŵakaŵa pa mizere iyi, kuti ŵaŵakhozge na kuŵawovwira vinyake na vinyake. Ŵabali na ŵadumbu ŵithu awo ŵakafiska kuchimbilira ku vyaru vinyake vya pafupi ŵakapokelereka na Ŵakaboni ŵanyawo awo ŵakanyamura vimanyikwiro vya jw.org, ŵakaŵa ŵakunozgeka kuŵapembuzga na kuŵawovwira munthowa zakupambanapambana.

• Chachitima ntchakuti, pa March 1, 2022, mubali yumoza wakumangwa wakufuma ku Kharkiv wakakomeka ndipo muwoli wake wakapwetekeka chomene panyengo iyo ŵakaphuliska mabomba

• Ŵadumbu ŵanyake ŵatatu nawo ŵakapwetekeka

• Ŵapharazgi ŵakujumpha 5,000 ŵali kusamuka mu nyumba zawo

• Nyumba ziŵiri zili kusakazikirathu

• Nyumba zitatu zili kunangika chomene

• Nyumba 35 zili kunangika pachoko waka

• Nyumba za Ufumu ziŵiri zili kunangika

• Ŵapharazgi ŵanandi pasono ŵalije mwaŵi wa magesi, netiweki ya ma foni, maji na vinyake

• Makomiti Ghakovwira Para Kwachitika Soka 27 ghali kwimikika ku Ukraine

• Ŵapharazgi 867 ŵakawovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Makomiti Ghakovwira Para Kwachitika Soka ghakugwira ntchito kuti ghapeleke vinthu vyakukhumbikwa nga ni chakurya na maji.

Viŵelengero ivyo vili pachanya apa ndivyo tikapokera pakwamba.

Tikulomba kuti mphanyi ŵabali na ŵadumbu ŵithu ŵalutilira kuŵa ŵavinjeru na kupulikiska kuti ŵazizipizge vinthu vyamabuchi kweniso masuzgo agho ghalipo apo ŵakulongorana chitemwa chanadi.—Zintharika 9:10; 1 Ŵatesalonika 4:9.