Pa November 12, 2020, Khoti Lakuwona vya Wanangwa wa Ŵanthu ku Europe, likadumura kuti pa milandu yose yitatu, charu cha Ukraine chikaŵabudira Ŵakaboni ŵa Yehova. Milandu iyi yikaŵa ya pakati pa Zagubnya na Tabachkova na charu cha Ukraine, Migoryanu na Ŵanyake na charu cha Ukraine, na Kornilova na charu cha Ukraine. Milandu iyi yikaluta ku khoti ili mu 2014 na mu 2015. Pa mulandu uliwose, ŵabali ŵakadandauranga kuti ŵapolisi ŵakachitapo kanthu yayi Ŵakaboni ŵa Yehova ŵakati ŵadandaura kuti ŵanthu ŵanyake ŵaŵachitira nkhaza. Khoti Lakuwona vya Wanangwa wa Ŵanthu ku Europe likati charu cha Ukraine chikatondeka kuvikilira wanangwa wa ŵabali ŵithu, ndipo likadumura kuti charu ichi chiŵaphepiske wose awo ŵakachitirika nkhaza na ndalama zakukwana madora 17,400 gha ku America.

Mulandu wa pakati pa Zagubnya na Tabachkova na charu cha Ukraine: Pa April 20, 2009, Mudumbu Zagubnya na Tabachkova ŵakapharazganga nyumba na nyumba mu muzi wa Novi Mlyny. Wasembe munyake wa Orthodox zina lake, Mykola Lysenko wakati waŵawona, wakamba kuŵatimba mwankhaza na ndodo ku mutu na ku msana. Nangauli wasembe uyu wakazomera kuti wakachita ivi chifukwa wakakhumbanga “kuŵawofya” kweniso kuti “ŵaleke kupharazga,” kweni wakapokera chilango chilichose yayi.

Mulandu wa pakati pa Migoryanu na Ŵanyake na charu cha Ukraine: Ŵakaboni ŵa Yehova ŵakukwana 21 pamoza na ŵalendo ŵawo, ŵakawungana kuti ŵakumbukire nyifwa ya Yesu Khristu pa April 5, 2012. Kweni wasembe munyake wa Orthodox ku Moscow zina lake O. Greku pamoza na gulu lake, ŵakiza na kutimbanizga ungano wa Ŵakaboni ŵa Yehova uwu. Gulu ili likamba kutuka na kofya awo ŵakaŵa pa ungano uwu, kusazgapo ŵana na ŵanakazi ŵanyake ŵachekuru.

Pakati pajumpha nyengo, wasembe yura pamoza na gulu lake, ŵakalutilira kutambuzga Ŵakaboni ŵa Yehova. Ŵakaŵatchayanga, ŵakawotcha galimoto ya mubali withu, ndipo ŵanyake ŵakaponya bomba ilo ŵakapanga waka ŵekha mu nyumba yinyake ya Ŵakaboni awo ŵakaŵa kuti ŵakugona. Ivi vyati vyachitika, ŵabali ŵithu ŵakakadandaura ku polisi ndipo ŵakapeleka ukaboni wakukwana. Ndipo nyengo zinyake awo ŵakaŵachitiranga nkhaza izi ŵakajambulikanga mu vidiyo kuti ŵakuchitira nkhaza ŵabale. Kweni ŵapolisi ŵakakana kuti ŵanthu aŵa ŵakachitirika nkhaza chifukwa chakuti ŵakaŵa Ŵakaboni ŵa Yehova, ndipo ŵakati ŵanthu awo ŵakuwoneka mu vidiyo ndiwo yayi. Wasembe uyu pamoza na gulu lake ŵakapokera chilango chilichose yayi.

Mulandu wa pakati pa Kornilova na charu cha Ukraine: Pa March 7, 2013, Mudumbu Kornilova na Serdiuk ŵakapharazganga mu tawuni ya Nosivka kuchemera ŵanthu ku Chikumbusko cha nyifwa ya Yesu Khristu. Mwanalume munyake wakamba kuŵatuka na kuyowoyera misinjiro chisopa chawo. Mwanalume uyu wakaŵawukira, ndipo wakamutimba Mudumbu Kornilova kumaso mwakuti wakapweteteka chomene. Mudumbu withu wakakhala mazuŵa 11 mu chipatala. Ndipouli, ŵapolisi ŵakakana vyakuti mwanalume uyu wakachita ivi chifukwa chakuti iwo ŵakaŵa Ŵakaboni ŵa Yehova, kweni ŵakati panji wakachita ivi chifukwa chakuti “ŵakutinkhana waka.” Khoti likamulipiska mwanalume uyu ndalama zichoko waka.

Ŵabali ŵakufuma ku ofesi ya munthavi ya Ukraine ŵakayezga kudumbiskana na ŵalaraŵalara ŵa mu dera lawo, ŵalaraŵalara ŵa boma, kweniso ŵalaraŵalara ŵa mu vyaru vinyake na kuŵaphalira vya nkhaza izo ŵabali ŵithu ŵakukumana nazo. Ŵabali ŵithu ŵakati ŵachita vyose ivyo ŵangafiska, mu 2014 ŵakakamangara ku Khoti Lakuwona vya Wanangwa wa Ŵanthu ku Europe. Nakuti mu 2013, charu cha Ukraine chikamba kuwona kuti ŵanthu ŵanyake ŵakachitiranga nkhaza ŵavisopa vinyake. Lipoti la 2013 la Ofesi ya Kuwona Madandauro gha Ŵanthu ku Ukraine likati: “Pakuti ŵapolisi ŵakufufuza yayi milandu yakukhwaskana na nkhaza, ndipo makhoti ghakulanga yayi awo ŵakuchitira ŵanyawo nkhaza chifukwa cha chisopa chawo, ivi vikupangiska kuti awo ŵakuchitira ŵanyawo nkhaza ŵalutilire.” Pakuyowoyaso vya charu cha Ukraine, lipoti linyakeso la 2013 la United Nations Human Rights Committee likati, ntchachitima chomene kuwona kuti milandu yakukhwaskana na nkhaza, kusazgapo kuchitira nkhaza Ŵakaboni ŵa Yehova, yikuwoneka kuti ni milandu yichokoyichoko. Komiti iyi yikamalizga na mazgu ghakuti, charu cha Ukraine “chikwenera kuchitapo kanthu na kuwoneseska kuti milandu iyi ŵayifufuza na kupeleka chilango ku awo ŵali kupalamura . . . kweniso kuphepiska wose awo ŵali kuŵachitirapo nkhaza.”

Mu vyaka vya sonosono apa, charu cha Ukraine chikambapo kuchitapo kanthu kuti vinthu visinthe. Nangauli Ŵakaboni ŵa Yehova ŵakusopa mwawanangwa, kweni tikugomezga kuti ivyo Khoti Lakuwona vya Wanangwa wa Ŵanthu ku Europe lili kudumura viwovwirenge kuti ŵapolisi ŵa ku Ukraine kweniso ŵa vyaru vinyake ŵalutilire kuvikilira wanangwa wa ŵabali na ŵadumbu ŵithu. Tikulindilira nyengo iyo Yehova, uyo “nthowa zake zose ni zaurunji,” wazamumazga nthambuzgo ku wose awo ŵakumusopa.—Dotoronome 32:4.