Pa Chinayi, December 17, 2020, Khoti Lakuwona vya Wanangwa wa Ŵanthu ku Europe likapeleka chigamuro chake pa mulandu wapakati pa Tretiak na. Ukraine ndipo likaŵikira kumanyuma Mubali Oleksandr Tretiak. Pa November 26, 2013 Mubali Tretiak wakatimbika mwankhaza chomene na ŵanthu ŵatatu, apo wakaweranga kufuma mu upharazgi. Khoti Lakuwona vya Wanangwa wa Ŵanthu ku Europe likati ŵalaraŵalara ŵa boma la Ukraine ŵakatondeka kuti ŵafufuze makora mulandu uwu. Khoti ili likadumura kuti mubali withu waphepiskike na ndalama zakukwana madola 9,100 gha ku America.

Mubali Tretiak wakatimbika chomene mwakuti wakakhala pafupifupi mwezi umoza mu chipatala. Ŵapolisi ŵakaluta kukafufuza, pamanyuma pa myezi yitatu. Ŵakakana kuti mubali withu wakatimbika pa vifukwa vya chisopa, kweniso kuti wakapwetekeka chomene. Pamanyuma, ŵapolisi ŵakaŵika mulandu uwu mu gulu la milandu yichokoyichoko. Chinyake ntchakuti, ŵakati pa ŵanthu ŵatatu yumoza pera ndiyo wali na mulandu, ndipo ŵakayowoya ivi munthu uyo ŵakatenge wali na mulandu wati wachimbira mu charu ichi. Pa ŵanthu ŵatatu awo ŵakatimbako mubali withu, yumoza wakaŵa mupolisi, ndipo ŵaŵiri ŵakatoleka kuti mbakaboni pa mulandu uwu. Palije na yumoza uyo wakalangikapo. Ivi ni vinyake mwa vinthu vyambura urunji ivyo vikapangiska kuti Mubali Tretiak wakamangare nkhani iyi ku Khoti Lakuwona vya Wanangwa wa Ŵanthu ku Europe mu 2015.

Mu chigamuro chake, Khoti Lakuwona vya Wanangwa wa Ŵanthu ku Europe likatiso“ŵalaraŵalara ŵa boma la Ukraine ŵakatondeka kufufuza makora nkhani iyi ndipo ŵakaŵikako mahara yayi ku madandawuro gha uyo ŵanthu ŵakamuchitira nkhaza,” ivyo vikukolerana yayi na fundo za European Convention on Human Rights.

Tikugomezga kuti chigamuro ichi chiwovwirenge pa kuvikilira wanangwa wa kusopa wa ŵabali na ŵadumbu ŵithu ku Ukraine na vyaru vinyake. Kweni chikuru chomene, tikuwonga Yehova, uyo wakutichitira urunji.—Chitengero cha Yeremiya 3:59.