Mulenji, pa February 24, 2022, tulo tukamara chifukwa cha chiwawa chikuru icho chikapulikikwanga. Pakwamba nkhatenge ni ŵaleza chifukwa kukalokwanga vula, kweni pamasinda nkhamanya kuti ntchiwawa cha mabomba.

Nkhawona kuti nisame waka mu nyumba yane, iyo yikaŵa ku Mariupol. Zuŵa lakulondezgapo, nkhaluta ku nyumba ya abuya ŵane a Iryna iyo yikaŵa kuwaro kwa msumba uwu. Kufuma apo, amama ŵane a Kateryna, nawo ŵakiza kwa abuya uko nkhaŵa pamoza na muvyara wane. Apo tikaŵa kwa abuya tikaŵa ŵakuvikilirika kwa ka nyengo, kweni tikagonanga mu kachipinda kapasi kwa mazuŵa ghanandi.

Ulendo unyake, bomba likawira mu dimba la mphangwe apo ise tikabisama mu kachipinda kapasi. Kukapulikikwa chiwawa chikuru chomene. Nkhalomba kwa Yehova kufumira pasi pa mtima. Pati pajumpha sabata yimoza, tikawona kuti umoyo withu ungaŵa pangozi usange tingalutilira kukhala mu nyumba ya abuya. Ntheura tikaghanaghana vya kuweleraso mu msumba wa Mariupol kuti tikasange nthowa yakuchimbilira. Nkhalomba Yehova kuti watovwire na kutivikilira apo tikufumamo mu msumba.

Ukaŵa mulenji wa pa March 4. Kukaŵavya sitima za pa mtunda zakufuma ku Mariupol chifukwa ŵasilikari ŵakazingilizga msumba wose. Ntheura kwa mazuŵa 10 tikabisama waka mu holo yakuchitiramo maseŵero ya mu msumba uwu pamoza na ŵanthu ŵanyake ŵanandi. Holo iyi yikazura chomene mwakuti tikagonanga waka pasi. Malo ghake ghakaŵa ghawemi yayi, ndipo chikaŵa chakusuzga kusanga chakurya na maji ghakotcha. Tikayimanga pa mzere kwa maora ghanandi chomene.

Zuŵa linyake, bomba likaphulika chapafupi waka na holo iyo ise tikaŵamo. Nkhongono ya bomba ili yikaŵa yikuru chomene mwakuti mawindo ghanandi gha holo iyi ghakasweka ndipo ivi vikapangiska kuti mukati mwambe kuzizima chomene.

Kasi mukuwona kuti ntchivichi chikanovwira pa nyengo yakusuzga iyi? Ni nkhani ya Yobu. Nkhati nawona ŵanthu ŵakuhangayika na kuphulika kwa mabomba, nkhamba kuŵazga vya nkhani ya Yobu mu Baibolo lane. Ivi vikanovwira kuti nijipulikeko makora. Vikaŵa nga kuti nili na Yobu mu holo iyi, ndipo nkhumuphalira kuti: “Sono ndipo nkhupulikiska umo ukajipulikiranga!” Yobu wakataya chilichose: mbumba yake, umoyo uwo wakaŵa nawo pakwamba, na katundu wake yose. Nane nkhataya katundu wane yose. Kweni mbumba yane tikaŵa lumoza, tose tikaŵa makora waka. Apa nkhawamo kuti kwa ine vinthu vikaŵako makora. Mbwenu nkhamba kujipulikako makora.

Pa March 14, tikapulika kuti gulu linyake likafiska kuchimbira makora waka mu msumba uwu. Nase tikasankha kusamuka. Mwamwaŵi tikasanga galimoto pamoza na ŵanthu ŵanyake awo tikaŵira lumoza mu holo iyi.

Magalimoto 20 ghakanyamuka kufuma mu msumba uwu. Taŵanthu 14 tikafyenyana kumasinda kwa galimoto yakunyamura katundu. Ndipo mabomba ghakawanga mumphepete mwithu. Nkhalombanga kwambura kuleka. Tikati tafuma mu msumba wa Mariupol, dilayivala wa galimoto iyo tikakwera wakayimika galimoto, wakafuma kuwaro, na kwamba kulira. Wakagega mabomba ghose agho ŵakathya pasi mu msewu umo tikendanga. Tikapulika kuti pati pajumpha mazuŵa ghaŵiri tati tafuma mu msumba uwu, holo iyo tikabisamangamo ŵakaphuliska na bomba ndipo ŵanthu pafupifupi 300 ŵakafwa.

Pamanyuma pa maora 13, tikafika ku Zaporizhia. Mulenji wakulondezgapo tikakwera sitima ya pa mtunda kuya ku Lviv. Tikazura chomene mu sitima iyi, mwakuti malo agho ghakwenera kuŵa na ŵanthu ŵanayi pera, mukakhalanga ŵanthu 16. Mukawotchanga maseŵera cha. Ine nkhimilira nthowa yose. Nakuti ndigho ghakaŵa malo ghekha agho munthu ungasangako mphepo ziwemi. Pa March 16, tikafika ku Lviv, uko ŵabali na ŵadumbu ŵakatipokelera na mawoko ghaŵiri. Tikakhala dankha mu Nyumba ya Ufumu kwa mazuŵa ghanayi. Chitemwa icho ŵabali na ŵadumbu ŵakatilongora chikaŵa chapadera chomene, mwakuti nkhathiska na masozi. Ichi chikaŵa chawanangwa chakufuma kwa Yehova.

Pa March 19, tikaghanaghana vya kufumako ku Ukraine na kuluta ku charu chapafupi cha Poland, ndipo uku nako ŵabali na ŵadumbu ŵakatipokelera makora chomene, ine, amama, abuya na muvyara wane. Ŵakatipa chilichose icho tikakhumbikwiranga. Ningati ŵabali ŵakatilongora chitemwa chikuru chomene.

Nili na vyaka 19, kweni mu vyose ivyo najumphamo, nasambira kuti ntchakuzirwa chomene kukhozga chipulikano chithu uku vinthu vichali makora pa umoyo withu. Chipulikano chikanovwira kuti nipone ku nyifwa. Viŵenge kuti nkhasambiranga panekha yayi pambere nkhondo yindambe, mphanyi nkhafiska yayi kuzizipizga.

Yehova ni Dada uyo wakutighanaghanira chomene. Nyengo yose iyi, nkhajipulikanga kuti wanikora pa woko lane lamalyero ndipo wakunilongozga nyengo zose. Nkhusoŵa na mazgu ghakuyowoya kulongora kuti nkhuwonga pa vyose ivyo Yehova wanichitira.—Yesaya 41:10.