Na wovwiri wa Yehova, Mudumbu Liudmyla Mozul na Mudumbu Kateryna Rozdorska ŵakuzizipizga chitima icho ŵali nacho chifukwa cha nkhondo. Ŵafumu ŵawo, Petro Mozul na Dmytro Rozdorskyi, ŵakaŵa ŵamoza mwa Ŵakaboni ŵa Yehova ŵakwamba kufwa pa nkhondo ya ku Ukraine. Chachitima, ntchakuti kufika pasono, ŵabali na ŵadumbu ŵithu 34 ndiwo ŵali kufwa pa nkhondo iyi.

Petro na Liudmyla ŵakabatizika mu 1994. Ŵakakhala mu nthengwa vyaka 43.

Liudmyla wakuti: “Zuŵa lililose ŵabali na ŵadumbu ŵakuniphalira mazgu ghakupembuzga. Ŵakulutilira kuniyimbira foni. Nkhakhwaskika chomene na mazgu agho ghakaŵa mu kalata yakufuma ku ofesi ya munthavi ya Ukraine, mwakuti nkhathiska masozi.”

Nkhondo yikamba pa February 24, 2022. Petro, uyo wakaŵa muteŵeti wakovwira mu mpingo wa chiyowoyero cha mawoko, wakakomeka apo iyo pamoza na mbumba yake ŵakayezganga kuti ŵachimbire ku Kharkiv apo kukaphulikanga mabomba pa March 1, 2022.

Pa zuŵa ilo, pamanyuma pakuti mabomba ghanandi ghaponyeka kale kwa mazuŵa ghanandi, ndege za nkhondo zikadukanga na kuponya mabomba ghanyake mu msumba. Mbumba iyi yikapakira vinthu vyakukhumbikwa vichoko waka na kuchimbira mu maminiti 30. Petro na Liudmyla ŵakaŵa mu galimoto. Mwana wawo, Oleksii, na muwoli wake, Maryna, ŵakaŵa mu galimoto yinyake. Liudmyla wakuti: “Tikendanga cha kusika kwa msewu mu chigaŵa icho mukukhala ŵanthu bweka ndipo ndege za nkhondo zikamba kuponya mabomba pafupi nase. Galimoto yikamba kusunkhunyika chifukwa cha nkhongono za mabomba.”

Petro, uyo wakaŵa na vyaka 67, wakakhweteskera kumphepete galimoto yake kuti yileke kugandana na galimoto ya Oleksii, kweni wakapwetekeka chomene. Iyo na Liudmyla ŵakaŵatolera ku chipatala uko pamanyuma Petro, wakatayika. Liudmyla wakapwetekeka pa lundi kweniso pa nthumbo visulo ivyo vikafuma ku mabomba agho ghakaphulika ndivyo vikamupweteka. Oleksii na Maryna ŵakapwetekeka yayi. Liudmyla wakamanya vya nyifwa ya mfumu wake pamanyuma pa mazuŵa ghatatu ŵati ŵamufumiska mu chipatala.

Liudmyla wakuti: “Para nkhughanaghanira vya lusungu lwa Yehova na viwemi ivyo watinozgera kunthazi uku, nkhuŵa na mtende wa mu mtima. Nili na chigomezgo chose kuti mu charu chiphya nizamumuwonaso mfumu wane, nkhulindilira mwakunweka nyengo yakukondweska iyi.”

Dmytro na Kateryna ŵakakhala mu nthengwa kwa vyaka 8. Wakayowoya nayo kaumaliro apo wakaŵa ku ntchito kwake, ndipo mazgu ghake ghaumaliro ghakaŵa ghakuti, “Nkhwiza sonosono apa.”

Pati pajumpha maora, pa March 8, 2022, uyo ŵakagwiliranga lumoza ntchito wakamwimbira foni Kateryna na kumuphalira kuti Dmytro wakanda pa bomba ilo ŵakaliwundira pasi ndipo ŵaluta nayo ku chipatala. Wakafwa pamanyuma pa maora 5 apo ŵakamuchitanga opareshoni.

Wati wapulika vya nyifwa ya Dmytro, Kateryna wakuti: “Mu usiku wura, nkhajipulika nga kuti Yehova wanikora waka pa woko yayi kweni waniyegha mu mawoko ghake. Nkhajipulika kuti Yehova wali nane pafupi chomene.”

Dmytro, uyo wali na vyaka 28, wakabatizika mu 2006 ndipo wakaŵa mulara mu mpingo ku Chigaŵa cha Donetsk ku Ukraine.

Pamanyuma pa pulogiramu ya nyifwa ya Dmytro, Kateryna wakanyamuka ulendo wa maora 12 kuluta ku chigaŵa icho vinthu vili makorako ku Ukraine. Iyo wakuti: “Ŵabali na ŵadumbu ŵa ku Ukraine kweniso vyaru vinyake wanikhozga chomene. Ŵanipangiska kuti nijipulikenge kuti nkhutemweka chomene, ivi vyachepeskako chitima chane.”

Iyo wakuyowoyaso kuti: “Nkhupembuzgika para nkhupharazga. . . . Para vyanisuzga chomene, nkhukumbukanga mavesi gha mu Baibolo nga ni lemba la Ŵafilipi 4:6, 7.”

Tili na chigomezgo chose kuti Yehova walutilirenge kuŵapa nkhongono na kuŵakhozga ŵabali na ŵadumbu ŵithu awo ŵataya ŵakutemweka ŵawo chifukwa cha nkhondo ya ku Ukraine.—Salimo 61:1-3.