Ŵabali na ŵadumbu mu misumba ya Mariupol, Kharkiv, Hostomel, na misumba yinyake ŵakusangana na masuzgo ghakuru apo mabomba ghakulutilira kuphulika ku Ukraine. Ŵanyake ŵakhala mu vipinda panji malo ghakuvikilirika kwa sabata yimoza sono. Chakurya chikusoŵa, magesi, intaneti kweniso netiweki ni vyakusuzga. Ivi vyapangiska kuti chiŵe chakusuzga kuyowoyeskana.

Chachitima ntchakuti, Mubali Dmytro Rozdorskyi, wa vyaka 28, uyo wakaŵa mubali mulara ku Myrnohrad, wakafwa wati wapwetekeka chifukwa chakuti wakakanda pa bomba ilo wakaliwundira pasi. Tikulombera wose awo ŵataya ŵakutemweka ŵawo na ŵabali na ŵadumbu ŵithu awo ŵakukhala mu vigaŵa ivyo mukuphulika chomene mabomba.—2 Ŵatesalonika 3:1.

Kufika pa March 7, 2022, tili kupokera chiŵelengero icho chili pasi apa kufuma ku Ukraine:

• Ŵapharazgi ŵawiri ŵali kufwa

• Ŵapharazgi 8 ŵali kupwetekeka

• Ŵapharazgi 20,617 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu chenechichi

• Nyumba 25 zili kusakazikirathu

• Nyumba 29 zili kunangika chomene

• Nyumba 173 zili kunangika pachoko waka

• Nyumba za ufumu 5 zikanangika

• Ku Ukraine kuli kupangika Makomiti 27 Ghakovwira Para Kwachitika Soka

• Makomiti Ghakovwira Para Kwachitika Soka ghali kovwira ŵapharazgi 6,548 kusanga malo ghakukhala ghakuvikilirika

• Ŵapharazgi 7,008 awo ŵali kuchimbilira ku vyaru vinyake ŵakovwirika na Ŵakaboni ŵanyawo

• Malo ghakuchitirapo Ungano ghamoza na Nyumba za Ufumu 30 kumanjiliro gha dazi kwa Ukraine, nga nkhu vigaŵa vya Chernevtsi, Ivano-Frankivsk, Lviv, na Transcarpathian, zili kunozgeka kuti mufikirenge awo ŵachimbira kukwawo