Ŵabali na ŵadumbu ŵithu ku Ukraine ŵandaleke kovwira Ŵakhristu ŵanyawo. Ŵakulutilira kulongorana chitemwa chakujipata.

Mudumbu Olena wali na vyaka 81. Pa June 6, bomba likaphulika chapafupi waka na nyumba yake. Bomba ili likasakazirathu nyumba ya mzengezgani wawo ndipo likajima chikhululu chitali mamita 7. Nkhongono ya bomba ili yikaŵa yikuru chomene mwakuti nyumba ya Mudumbu Olena yikanangika chomene.

Iyo wakati: “Nkhaŵa mu tulo, ndipo chiliŵa chikawa pafupi waka na mutu wane. Chuvu chikati waka ng’ondo muchanya. Magilasi na malibwe ghakati waka mbwee palipose. Nkhawonga Yehova kuti nkhapona.” Ŵabali na ŵadumbu ŵakiza kuzakamuwona Mudumbu Olena pati pajumpha maminiti ghachoko waka kufuma apo bomba likaphulikira, kusazgapo na mubali uyo nayo nyumba yake yikanangika chomene na bomba. Mudumbu Olena wakulutizga kuti: “Ŵabali ŵakati ŵafika, ŵakasoŵa na chakuyowoya wuwo. Nkhakhozgeka chomene chifukwa cha kwiza kwawo. Nkhawona kuti ŵali nane pafupi nadi.”

Serhii, uyo ni mubali mulara ndipo wakutemwa kuluta kukamuwona Mudumbu Olena lumoza na ŵawukirano ŵa mu mpingo mwawo, wakati: “Nkhati napulika kuti bomba laphulika pafupi na nyumba ya Mudumbu Olena, nkhachita wofi chomene ndipo nkhafipanga mtima. Mtima ukawelera mu malo nati namuwona kuti wandapwetekeke chomene yayi. Chakukondweska ntchakuti, nangauli nyumba ya Mudumbu Olena yikanangika chomene na bomba, kweni chinthu chakwamba icho wakakhumbanga, ghakaŵa mabuku ghithu agho wakapokera kale kufuma ku ŵabali.”

Mwamwaŵi, ŵachibali ŵake ŵakamusangira nyumba. Mpingo uchali kumupa wovwiri wakukhumbikwa ndipo ŵalara nawo ŵakumukhozga Mudumbu Olena zuŵa lililose. Ŵabali na ŵadumbu ŵakamupenjera vyakovwira kuti wapulikenge makora mwakuti nayo wapindurenge na maungano gha mpingo. Iyo wakuti: “Nyengo zinyake nkhuŵavya nkhongono, kweni maungano ghakunovwira kusangaso nkhongono. Ŵabali na ŵadumbu ŵakuniyimbira foni pafupipafupi ndipo nkhuwonga chomene ivyo ŵakunichitira.”

Banja linyake likalongosora umo vikaŵira apo likabisamanga mu kachipinda kapasi ka Nyumba ya Ufumu pamoza na ŵapharazgi ŵanyake 200. Mudumbu wakati: “Nkhakhozgeka chomene na lusungu ulo ŵabali ŵalara ŵakatilongoranga. Ŵakanikumbuska vya Davide, uyo wakatenge wafwenge apo wakalimbananga na nkhalamu na nkhalamira kuti waponoske mberere. Ŵabali ŵalara awo tikaŵira lumoza mu kachipinda kapasi ŵakaŵikanga umoyo wawo pangozi apo ŵakalutanga kukapenja chakurya, maji, na mafuta ghakovwira kuti tiŵe na ungweru. Nakuti ivi vikawovwira kuti tilutilire kuchita maungano gha mpingo na ghakunozgekera uteŵeti. Nanga ni apo nkhondo yikaŵanga kuti yanunkha, ŵabali aŵa ŵakalutanga kanandi waka ku nyumba za ŵabali na ŵadumbu kuti ŵakaŵape chakurya na maji kweniso kuŵapembuzga. Nkhuŵachindika chomene ŵabali ŵalara aŵa. Pambere ivi vindachitike, nkhaŵawonanga waka kuti mbasambizgi na ŵapharazgi, kweni sono nkhuwona kuti mbaliska ŵakugomezgeka. Nkhuŵawonga chomene chifukwa cha chiyelezgero chawo chiwemi pa nkhani ya chikanga, lusungu, na kugomezgeka!”

Ŵapharazgi mu mpingo unyake ŵakalemba kalata ku ofesi ya munthavi ya Ukraine pa nkhani ya awo ŵakulongozga mulimo wa kovwira ŵanji, ŵakati: “Ndise ŵakuwonga chomene. Tikusoŵa na chakuyowoya pakuwona umo Yehova wakutipwelelera kwizira mu ŵabali na ŵadumbu. Tajiwonera tekha kuti mazgu gha Yesu agha ngaunenesko, agho ghakuti: ‘Usange mukutemwana, wose ŵamanyenge kuti ndimwe ŵasambiri ŵane.’”—Yohane 13:35.

Kufika pa June 21, 2022, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 42 ŵali kufwa

• Ŵapharazgi 83 ŵali kupwetekeka

• Ŵapharazgi 31,185 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu ichi

• Nyumba 495 zili kusakazikirathu

• Nyumba 557 zili kunangika chomene

• Nyumba 1,429 zili kunangika pachoko waka

• Nyumba za Ufumu 5 zili kusakazikirathu

• Nyumba za Ufumu 8 zili kunangika chomene

• Nyumba za Ufumu 34 zili kunangika pachoko waka

• Makomiti Ghakovwira Para Kwachitika Soka 27 ghali kwimikika ku Ukraine

• Ŵapharazgi 52,348 ŵakawovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 23,433 awo ŵali kuchimbilira ku vyaru vinyake ŵakovwirika na Ŵakaboni ŵanyawo