Pakuti pasono tambiraso kupharazga maso na maso, vyawovwira kuti ŵanthu ŵaŵe ŵakukondwa kweniso pachitika viwemi vinandi mu charu chose cha Ukraine. Ŵalaŵiliri ŵa dera na ŵalara mu mipingo ŵakuti ŵanthu ŵanandi ŵakondwa chomene kuwonaso tumashelufu twa mabuku ghithu, ndipo ŵakuyowoya kuti ŵakaŵasoŵa chomene Ŵakaboni ŵa Yehova.

Tatiana uyo ngwa mu mpingo wa Serhiivka ku Chigaŵa cha Odesa, wakaghanaghana vya kukayendera ŵanthu awo wakaŵapharazgira pambere muliri undambe. Iyo wakuti, “Kufuma waka pakwamba, nkhajiwonera nekha umo Yehova watitumbikira chifukwa cha kuyezgayezga kwithu kuti tambireso kupharazga maso na maso.” Zuŵa linyake, wakaluta kukendera mwanakazi munyake uyo wakakana kusambira Baibolo pambere muliri undambe. Kweni pa nyengo iyi mwanakazi uyu wakaŵa wakukhumbisiska chomene kudumbiskana fundo za mu Baibolo, ndipo wakazomera kwamba kusambira Baibolo. Tatiana wakati, “Nkhuwona kuti nkhwenera kulutaso ku ŵanthu wose awo tikapangana maulendo ghakuwelerako, na kukaŵapempha kuti tisambirenge Baibolo!”

Yevheniy na Lilia mbapharazgi awo ŵali kusama mu nyumba yawo, pakwamba ŵakakhalanga ku Mariupol. Chifukwa cha nkhondo iyo yikuchitika, ŵakachimbilira ku chigaŵa icho vinthu viliko makora kwenekuku ku Ukraine. Wose ŵakutemwa kupharazga. Nakuti ŵakulongosora kuti uteŵeti ukuŵawovwira kuti ŵaleke kughanaghanira chomene vya masuzgo ghawo. Iwo ŵakati: “Tikumanya kuti umoyo uliso umo ukaŵira pakwamba yayi. Ntchipusu yayi kuzgoŵera umoyo unyake, kweni tikukumbuka fundo yakuti woko la Yehova ndifupi yayi. Tili na wovwiri wa mzimu wake, ndipo ŵabali na ŵadumbu mbakunozgeka kutovwira kuzgoŵera umoyo unyake ku malo ghachilendo.”

Mu vigaŵa vinyake vya charu ichi, ŵabali ŵithu ŵakuchitira ukaboni kwizira mu milimo yawo yiwemi. Mwachiyelezgero, kagulu ka ŵabali mu msumba wa Mykolaiv kakagwira ntchito lumoza na wupu unyake wakovwira ŵanthu para kwachitika soka, kuti ŵanozge nyumba iyo ŵakusungamo katundu wakovwilira ŵanthu. Ŵabali ŵakanozga mapayipi gha maji, kukhoma mashelufu, na kupakira makora katundu munandi. Apo mulara wa wupu uwu wakiza kuzakendera ntchito iyi, wakazizwa chomene ndipo wakathiska na masozi. Iyo wakati, “Nakhazganga kuti vingachitika nthena yayi.”

Nangauli ŵabali ŵithu ku Ukraine ŵakusangana na masuzgo ghakuru, kweni mbakukondwa chifukwa cha kuchitako ntchito yakupharazga kweniso chifukwa cha kuŵikapo mtima ‘kuchita icho ntchiwemi.’—Ŵagalatiya 6:9.

Kufika pa July 13, 2022, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 42 ŵali kufwa

• Ŵapharazgi 97 ŵali kupwetekeka

• Ŵapharazgi 28,683 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu ichi

• Nyumba 524 zili kusakazikirathu

• Nyumba 588 zili kunangika chomene

• Nyumba 1,554 zili kunangika pachoko waka

• Nyumba za Ufumu 5 zili kusakazikirathu

• Nyumba za Ufumu 10 zili kunangika chomene

• Nyumba za Ufumu 36 zili kunangika pachoko waka

• Makomiti Ghakovwira Para Kwachitika Soka 27 ghali kwimikika ku Ukraine

• Ŵapharazgi 52,947 ŵakawovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 23,863 awo ŵali kuchimbilira ku vyaru vinyake ŵakovwirika na Ŵakaboni ŵanyawo