Kwamba pa July 23 m’paka 31, ŵapharazgi mu charu chose cha Ukraine kusazgapo na awo ŵali kuchimbilira mu vyaru vinyake, ŵakabatizika pa Ungano wa Chigaŵa wa 2022 wakuti ’Lutilirani Kuŵa Pamtende’! Kufika pa August 2, ŵanthu ŵakukwana 1,113 ku Ukraine ŵali kubatizika. Mubali munyake wa ku Ukraine wakati: “Nanga ni nkhondo yingatondeska yayi mulimo wakuzgora ŵanthu kuŵa ŵasambiri, nga umo Yesu wakalayizgira kuti: ‘Ine nili namwe mazuŵa ghose.’”—Mateyu 28:20.

Ndise ŵakukondwa kumuphaliraniko vyakuchitika ivi.

Natalia wa ku Kreminna, Chigaŵa cha Luhansk, wali na vyaka 63. Iyo lumoza na ŵana ŵake ŵanakazi ŵaŵiri ŵakamba kusambira Baibolo na Ŵakaboni ŵa Yehova cha m’ma 1990. Ŵana ŵake ŵakaluta panthazi chomene ndipo ŵakabatizika, kweni iyo wakabatizika yayi. Nkhondo yati yamba, mbumba yinyake ya Ŵakaboni ŵa Yehova yikamutora Natalia na kuchimbilira ku chigaŵa chinyake icho vinthu vikaŵako makora. Wakabisama lumoza na ŵanyake mu Nyumba ya Ufumu ku Ivano-Frankivsk.

Natalia wakuti: “Chifukwa cha kuphulika kwa mabomba ghakofya, nkhaŵa na chitima na wofi chomene. Ŵabali na ŵadumbu ŵakanilongora chitemwa chanadi. Nkhakhazganga yayi kuti ŵanganovwira nthena. Ningati pa nyengo iyi, vikaŵa nga kuti ŵasunkhunya chitemwa chane pa Yehova. Nkhamba kuŵazga chomene Baibolo, ndipo mudumbu munyake wakanipempha kuti tisambirenge Baibolo kwizira mu buku lakuti Mungakondwa na Umoyo Kwamuyirayira! Mudumbu uyu wakaŵa chawanangwa chakufuma kwa Yehova.” Natalia wakulutizga kuti: “Pasono ndine wakukondwa chomene kubatizika na kuŵa Kaboni wa Yehova. Nkhukhumba umoyo wane ukoleranenge na dango likuru chomene lakuti: nitemwenge Yehova Chiuta wane na ‘mtima wane wose na umoyo wane wose na maghanoghano ghane ghose.’”—Mateyu 22:37.

Apo nkhondo yikambanga, Olia wa ku Cherkasy wakaŵa kuti ni mupharazgi wambura kubatizika. Pa March 6, wakachimbilira ku Poland pamoza na mwana wake mwanakazi na muzukuru wake. Iyo wakuti: “Tikachimbira waka na vikwama vya pangozi, kweni ŵabali na ŵadumbu ŵakatipwelelera tose taŵatatu. Vyose ivi vikanikhorweska kuti gulu la Yehova ndakukolerana nadi ndipo likulongozgeka na mzimu wake. Nati nawona vyose ivi, nkhaŵa wakukhumbisiska chomene kujipeleka kwa Yehova. Iyo wakanovwira vinthu vyati vyanifyenya, ndipo nane nkhukhumba kumuteŵetera na mtima wose kuti nilongore kuwonga.”

Yulia wa ku Chigaŵa cha Donetsk wali na vyaka 18. Wakakulira mu mbumba ya Ŵakaboni kweni wakakuranga yayi mwauzimu kuti wabatizike. Iyo wakulongosora ivyo vikachitika pati pajumpha nyengo yichoko waka kufuma apo nkhondo yikambira. Iyo wakuti: “Nkhagona waka pasi ndipo nkhawonanga kuti nyengo yiliyose ningafwa. Misewu yose yakuzingilira apo mbumba yithu yikakhalanga yikaŵa kuti yasakazika kweni ise tikapona. Nkhati najumpha mu vyose ivi kweniso chifukwa cha kulomba na kughanaghanirapo pa makhaliro gha Yehova, ubwezi wane na iyo ukakhora chomene ndipo nkhaleka vyakukayika kuti nijipeleke kwa iyo. Yehova wakazgora malurombo ghane ndipo ivi vikanisimikizgira kuti wali nane pafupi chomene. Pakwamba Chiuta nkhamumanyanga mwapachanyapachanya kweni pasono nkhumutemwa chomene.” Yulia wakabatizika pa July 23.

Nkhondo yati yamba, David, uyo wali na vyaka 11 wakachimbilira ku Germany pamoza na mbumba yakwake. Wakaŵa mupharazgi wambura kubatizika kufuma apo wakaŵa na vyaka 9. Pasono ngwakukhumbisiska kufiska vilato vyake vyauzimu. Iyo wakuti: “Nasankha kubatizika chifukwa nkhumutemwa Yehova ndipo nkhukhumba kuŵa mubwezi wake. Apo nkhabatizikanga, nkhathiska masozi gha chimwemwe pakumanya kuti nanjira mu mbumba yapadera ya Yehova. Nkhutemwa kuphalirako ŵanthu vyakukhwaskana na Yehova na ivyo watichitirenge, ntheura pasono chilato chane ntchakuti niŵe mupayiniya. Nkhukhumbaso kuteŵetera ŵabali na ŵadumbu ŵane mu mpingo mwithu ndipo khumbo lane ndakuti nizakaŵe muteŵeti wakovwira. Chilato chane chinyake ntchakuti nizakateŵetere pa Beteli. Nakuti ili ndilo ni khumbo lane kufuma waka apo nkhaluta kukawona ofesi ya munthavi ku Lviv mu 2018.”

Olena wa ku Kyiv wakaŵa mupharazgi wambura kubatizika mu 2011. Wakalopwa kwa vyaka 10. Mu 2020, ŵabali ŵalara ŵakaluta kukamwendera ndipo ŵakamupa burosha lakuti Welerani kwa Yehova. Iyo wakuti: “Nkhambiraso kusambira Baibolo na kuwungana na mpingo. Ndipouli, pati pajumpha kanyengo mbwenu nkhalekaso. Mu nyengo ya nkhondo iyi, Yehova wakazgora malurombo ghane, ndipo nkhajiwonera nekha kuti wakunivikilira, wakunitemwa, ndipo wakanipanga mtende wa mu mtima. Nkhachimbilira ku Romania ndipo nkhasanga Ŵakaboni ŵa Yehova kwenekuku. Chitemwa icho ŵabali ŵakanilongora vikaŵa nga kuti Yehova wanidikiska bulangeti kuti nipulikenge kuthukira.” Olena wakabatizika pa July 23. Iyo wakumalizga na mazgu ghakuti: “Nkhumuwonga chomene Yehova chifukwa wakazikira nane. Pasono nkhumanya kuti mazgu agha ngaunenesko, agho ghakuti ‘mu vinthu vyose, nkhusanga nkhongono mwa uyo wakunipa nkhongono.’”—Ŵafilipi 4:13.

Kufika pa August 2, 2022, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 43 ŵali kufwa

• Ŵapharazgi 97 ŵali kupwetekeka

• Ŵapharazgi 22,568 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu ichi

• Nyumba 586 zili kusakazikirathu

• Nyumba 613 zili kunangika chomene

• Nyumba 1,632 zili kunangika pachoko waka

• Nyumba za Ufumu 5 zili kusakazikirathu

• Nyumba za Ufumu 10 zili kunangika chomene

• Nyumba za Ufumu 37 zili kunangika pachoko waka

• Makomiti Ghakovwira Para Kwachitika Soka 27 ghali kwimikika ku Ukraine

• Ŵapharazgi 53,836 ŵakawovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 24,867 awo ŵali kuchimbilira ku vyaru vinyake ŵakovwirika na Ŵakaboni ŵanyawo