Nyumba pafupifupi 3,000 za Ŵakaboni ŵa Yehova zili kunangika panji kunangikirathu kufuma waka apo nkhondo yikambira ku Ukraine mu February 2022. Mu August, mwakovwirika na Dipatimenti Yakovwira Para Kwachitika Soka na Dipatimenti Yakuwona vya Mapulani na Kuzenga, ŵabali ku Ukraine ŵakamba kunozga nyumba izo zikanangika mu vigaŵa ivyo chivikiliro chiliko makora. Ntchito iyi yikasazgapo kuwezgerapo mtenje wa nyumba izo zili kunangika, na mawindo kweniso kunozga vinyake vichokovichoko. Nyengo zinyake, usange nyumba yanangikirathu, ŵakanozganga waka garaja na kuyizgora kuti yiŵe nyumba. Kufika pasono, ntchito zakuzenga zakukwana 37 zili kumara, ndipo zinyake 48 zili mukati.

Panyengo yakusuzga iyi ntchipusu yayi kuchita milimo yakuzenga iyi. Kweni ŵabali ŵandawelere nyuma yayi kovwirapo pa nyengo ya masoka iyi. Mudumbu Svitlana, uyo wali na vyaka 70, kufuma ku Velyka Dymerka, Chigaŵa cha Kyiv, wakuti: “Nkhaŵavya ndalama zakuti ninganozgera mtenje wa nyumba yane na munyake umo mukanangika. Yehova wanichitira vikuru chomene. Ŵabali ŵane ŵakiza na kunigwilira ntchito yose pa mazuŵa ghatatu pera.”

Mudumbu Nadiia ku Horenka, Chigaŵa cha Kyiv, wakalongosora kuti wovwiri uwo tikapika ukaŵa upharazgi ukuru chomene. Wakati: “Ntchito yakunozgaso ivyo vikanangika ukaŵa upharazgi wapadera ku waliyose. Nanga ni ŵanthu awo nkhuŵamanya yayi ŵakuyowoya kuti Ŵakaboni ŵa Yehova ŵakutemwana zanadi. Ŵakugomezga yayi kuti Ŵakaboni ŵanyane ŵakiza kuzakanovwira.”

Ŵanthu nanga ni awo nyumba zawo zikanangikirathu ŵakiza kuzakawovwirapo, nga umo vikaŵira kwa Yevhen na Tetiana. Nyumba ya mbumba iyi yikanangikirathu apo kukaphuliskika bomba. Kweni m’malo mwakuti ŵaghanaghanirenge masuzgo ghawo, iwo ŵakuŵikapo mtima kovwira ŵakaboni ŵanyawo. Yevhen wakuyowoya kuti: “Khumbo lithu ndakuti tovwire ŵanji. Para tikovwira ŵanji vikutovwira kuzizipizga masuzgo ghithu.”

Mwakuyana waka, pamanyuma pakuti ŵabali ŵanozga nyumba yake ku Hostomel, Chigaŵa cha Kyiv, mudumbu Lidiia wakajipeleka pa ntchito ya kovwira para kwachitika soka. Wakayowoya kuti: “Kwa masabata ghaŵiri, pakaŵa ŵabali ŵakukwana 16 na ŵadumbu awo ŵakanozganga nyumba yane. Nkhajiwona nga kuti nili kale mu charu chiphya. Nane sono nkhukhumba kovwira ŵanji.”

Sonosono apa, mubali wa mu Komiti ya Munthavi ku Ukraine wakaluta mu vigaŵa ivyo kukapelekeka wovwiri para kwachitika masoka kuti wakakhozge awo nyumba zawo zikanangika. Wakayowoya kuti: “Ŵabali ku Ukraine nyengo zose ŵakulongorana chitemwa kwa yumoza na munyake. kweni nkhondo iyi yapangiska kuti tiŵe ŵakukolerana chomene. Ntchakukondweska chomene kuwona kuti wovwiri uwo ŵabali ŵakapika ukaŵachiska kuti nawo ŵachite vinandi pakuteŵetera ŵanji, kweniso kuti “ŵanthu ŵanandi ŵawonge Chiuta,” nga umo pakuyowoyera pa lemba la 2 Ŵakorinte 9:12.”

Kufika pa December 20, 2022, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 47 ŵali kufwa

• Ŵapharazgi 97 ŵali kupwetekeka

• Ŵapharazgi 11,477 ŵali kuchimbira mu nyumba zawo

• Nyumba 590 zili kunangika

• Nyumba 645 zili kunangika chomene

• Nyumba 1,722 zili kunangika pachoko waka

• Nyumba za Ufumu 7 zili kunangika

• Nyumba za Ufumu 19 zili kunangika chomene

• Nyumba za Ufumu 68 zili kunangika pachoko waka

• Makomiti Ghakovwira Para Kwachitika Soka 26 ghali kwimikika ku Ukraine

• Ŵapharazgi 54,212 ŵakovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 26,892 awo ŵali kuchimbilira ku vyaru vinyake ŵakovwirika na Ŵakaboni ŵanyawo