Kufuma pa December 26, 2022, ŵapayiniya ŵanyengozose na ŵapadera ku Ukraine ŵali kwambiraso kuchita Sukulu za Ŵapayiniya ku malo uko vinthu viliko makora. Mwakuyana na umo vinthu viliri mu chigaŵa chawo, ŵapayiniya ŵakuchita ungano uwu maso na maso panji kwizira pa Zoom. Nangauli ŵakusangana na masuzgo, nga nkhuphulika kwa mabomba, kuzimwazimwa kwa magesi, masuzgo gha vyachuma ndiposo suzgo la intaneti, kweni ŵabali na ŵadumbu withu ŵakuŵikapo mtima kuti wapokere ulongozgi wakuzirwa uwu. Ntheura ŵabali na ŵadumbu withu ŵasanga vitumbiko vinandi chomene.

Natalia wa ku Kryvyi Rih wakuti: “Sukulu iyi yikaŵa ya panyengo yake kwa ine. Yikanovwira kuti nileke kufipa chomene mtima kweniso kuti nileke kuŵa na wofi chomene.” Mwakuyana waka, Anastasia wa ku Chernivtsi wakati: “Sukulu iyi yikanovwira kumanya kuti Yehova wakunitemwa chomene. Nangauli chaka icho chajumpha chikaŵa na masuzgo ghanandi, kweni sukulu iyi yikanikhozga chomene. Pasono nili wakukhumbisiska kuchita chilichose icho ningafiska kuti Yehova wanitumbike.”

Mupayiniya munyake wa ku Kitsman, zina lake Svitlana, pakwamba wakafipanga mtima chomene wati waphalirika kuti wamunjira sukulu. Iyo wakati: “Nkhalomba kwa Yehova kumuphalira ivyo nkhenjerwanga navyo, kusazgapo suzgo la vya ndalama. Nkhamugomezga chomene ndipo nkhadandawurapo yayi. Nkhawona kuti Yehova wakunitemwa chomene kweniso wakunipwelelera.” Pakuti Svitlana wakalimbikiranga, vikawovwira kuti mfumu wake uyo wakaŵa Kaboni wa Yehova yayi wambe kuwungana na mpingo.

Kaŵiri kose ŵapayiniya ku Zhytomyr ŵati ŵapulika kulira kwa maalamu ghakuchenjezga kuti kuphulikenge mabomba, ŵakachimbilira ku malo gha pasi ghakuvikilirika ku mabomba. Ŵakapemba moto kuti mu malo agha muthukire ndipo pamanyuma sukulu yikalutilira. Nangauli ŵakasangana na masuzgo ghose agha, Valentyna uyo wali kusamira ku Zhytomyr wakuti: “Nizamuluwa yayi sukulu iyi. Nkhajipulika nga kuti nili mu mapapindo gha Yehova.”

Nga umo viliri mu vyaru vinandi, ŵapayiniya ku Ukraine mbakukondwa chomene na kusintha kwa maora agho ŵakwenera kupeleka. Pamanyuma pa chipharazgo ichi, Yulia wakati: “Mu mtima nkhakondwa chomene ndipo nkhamba kumutemwa chomene Yehova. Mulenji wura nkhalomba kwa Yehova na kumupempha kuti wanovwire kuti nilutilire kuchita uteŵeti uwu. Nkhamanyanga yayi umo Yehova wazgolerenge, kweni nkhaŵa na chigomezgo chose kuti wazgorenge. Nati namanya kuti maora agho ŵapayiniya ŵakwenera kupeleka ghasintha, nkhongono zikakwera ndipo nkhawona kuti Yehova wakunitemwa chomene. Nkhani yakukondweska iyi yikawa ngati ntchakurya chakunowa pamanyuma pa sukulu iyi.”

Kufika pa January 24, 2023, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 47 ŵali kufwa

• Ŵapharazgi 97 ŵali kupwetekeka

• Ŵapharazgi 8,953 ŵali kuchimbira mu nyumba zawo

• Nyumba 590 zili kunangikirathu

• Nyumba 645 zili kunangika chomene

• Nyumba 1,722 zili kunangika pachoko waka

• Nyumba za Ufumu 8 zili kunangikirathu

• Nyumba za Ufumu 17 zili kunangika chomene

• Nyumba za Ufumu 76 zili kunangika pachoko waka

• Makomiti Ghakovwira Para Kwachitika Soka 26 ghali kwimikika ku Ukraine

• Nyumba 46 zili kunozgeka

• Nyumba za ufumu 5 zili kunozgeka

• Ŵapharazgi 54,445 ŵakovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 27,655 awo ŵali kuchimbilira ku vyaru vinyake ŵakovwirika na Ŵakaboni ŵanyawo