Mu vigaŵa ivyo nkhondo yanunkha chomene, nga nkhu Mariupol, kulije magesi panji vinthu vyakovwira kuti kuthukirenge, matelefoni na intaneti vyose vyatimbanizgika. Mawindo gha nyumba zinandi ghasakazika. Pasono chakurya na maji ni vyakusoŵa. Ŵabali na ŵadumbu ŵithu ŵakujumpha 2,500 ŵatondeka kufumako ku Mariupol. Mu misumba yinyake yichoko waka, nga ni msumba wa Bucha, Chernihiv, Hostomel, Irpin, Kyiv, na Sumy, mpata ukajulika wakuti ŵanthu ŵangafiska kufumamo. Ivi vikapangiska kuti ŵabali na ŵadumbu ŵithu ŵanandi ŵachimbilire mu vigaŵa ivyo vinthu viliko makora.

Mubali wa vyaka 36 uyo wakakhalanga ku Hostomel, ndipo ni mupayiniya kweniso mulara, wakachimbira pamoza na muwoli wake na ŵapapi ŵake. Wakulongosora ivyo vikachitika apo nkhondo yikafika mu msumba uwo wakakhalanga:

“Ndege yikaduka pachanya pa nyumba yithu. Magalimoto gha ŵasilikari kanandi ghakaŵanga waka palipose mu msewu. Ŵasilikari ŵakanjira mu nyumba yithu apo ise tikaŵa mukachipinda kapasi. Yumoza wawo wakalasa futi kanandi waka pa kachipinda aka. Vipolopolo vikafikira pa chikwama cha pa ngozi cha amama, ise tikakhwaskika yayi. Kwa maora pafupifupi ghatatu, tikatondekanga kwenda panji kupanga kachiwawa ka mtundu uliwose, uku ndikuti mabomba ghakuphulika kweniso kulasana kuli mukati. . . . Mulenji apo tikendanga mu galimoto, nkhondo yikawuka kufupi na uko tikaŵa. Ŵakasinja ŵakaŵa mu misewu . . . Pakaŵa pakofya, kweni kukhalilira mu chigaŵa ichi ndiko kukaŵa kwakofya chomene.

“Vyakuchita vyose ivi vyasintha chomene umoyo withu. Tasambira kulondezga fundo zinandi za mu Baibolo. Mwachiyelezgero, tasambira umo tingachitira kuti tileke kufipa mtima na vya machero, tikhorwenge na vyakukhumbikwa ivyo tili navyo, na kuthemba Yehova para vinthu vyatifyenya chomene.”

Tikumanya kuti Chiuta withu Yehova, wakumanya makora masuzgo ghose agho ŵabali na ŵadumbu ŵithu ŵakuzizipizga ku Ukraine. Wangatondeka yayi kuŵawovwira.—2 Petrosi 2:9.

Kufika pa March 10, 2022, tili kupokera chiŵelengero icho chili pasi apa kufuma ku Ukraine:

• Ŵapharazgi ŵaŵiri ŵali kufwa

• Ŵapharazgi 8 ŵali kupwetekeka

• Ŵapharazgi 25,407 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu chenechichi

• Nyumba 25 zili kusakazikirathu

• Nyumba 59 zili kunangika chomene

• Nyumba 222 zili kunangika pachoko waka

• Nyumba za Ufumu 7 zili kunangika

• Ku Ukraine kuli kupangika Makomiti 27 Ghakovwira Para kwachitika Soka agho pasono nthena ghakugwira ntchito

• Makomiti Ghakovwira Para kwachitika Soka ghali kovwira ŵapharazgi 10,566 kusanga malo ghakukhala ghakuvikilirika.

• Ŵapharazgi 9,635 awo ŵali kuchimbilira ku vyaru vinyake ŵakovwirika na Ŵakaboni ŵanyawo