Tichali kuŵalombera ŵabali na ŵadumbu ŵithu ku Mariupol, uko ŵanthu ŵachali kutimbana mu msewu ndipo mabomba ghakulutilira kuphulika. Chachitima ntchakuti, ŵabali na ŵadumbu ŵithu 6 ŵakafwa apo kukaphulika mabomba. Ŵabali na ŵadumbu ŵithu awo ŵafwa ku Ukraine wose pamoza ni 10. Kweniso nga umo vikayowoyekera mu nkhani, holo yakuchitiramo maseŵero iyo mukabisama ŵanthu ŵakujumpha 1,000 ŵakaponyapo bomba sabata yamara. Palije yumoza wa ŵabali ŵithu uyo wakakomeka pachiŵembu ichi, kweni ŵachoko waka ŵakapwetekeka.

Ŵabali ŵithu pafupifupi 750 ŵali kuchimbira ku Mariupol, apo ŵanyake pafupifupi 1,600 ŵachali kwenekuko. Pasono ŵanandi ŵali ku mafumiro gha dazi kwa msumba uwu, uwo pasono uli pasi pa Russia.

Nga umo tikayowoyerapo kale, ŵabali na ŵadumbu ŵithu pafupifupi 200 ŵakaŵa mu kachipinda kapasi ka Nyumba ya Ufumu na Holo Yakuchitiramo Maungano Ghakurughakuru. Netiweki yati yiza mu kanyengo kachoko waka ŵabali awo ŵali mu malo agha ŵakapeleka lipoti lakuti:

“Apo mabomba ghakaphulikanga, ŵabali na ŵadumbu ŵachoko waka ŵakaŵa na wofi. Ŵanyake ŵakamba kulira. Tikati tapulika kuphulika kwa mabomba kuwaro, tikawonanga kuti tifwenge na mabomba agha panji tiphyenge waka na moto. Mubali mulara munyake wakasachizga kuti tambe kwimba sumu za Ufumu. Tikimbira lumoza sumu 10 panji 15, mwakulondezgana waka. Apo chiwawa chakuphulika kwa mabomba chikakuranga nyumba yikamba kusunkhunyika chomene, apa ndipo nase tikimbanga mwakukwezga. Kufuma apo tikaŵazga Salimo 27 na kudumbiskana. Pamanyuma, tose tikamba kuyowoya malemba gha mu Baibolo agho tikughatemwa na kulongosorapo umo ghakutikhozgera. . . . Tikajiwonera tekha kuti Yehova ni ‘Dada wa mtima walusungu na Chiuta wa chisangulusko,’ nadi uyo wangatizikiska mtima para vinthu vyatifyenya chomene.”—2 Ŵakorinte 1:3, 4.

Ŵabali ŵalara ŵakuŵika umoyo wawo pangozi pamoza na awo ŵali mu Komiti Yakovwira Para Kwachitika Soka kupenja Ŵakaboni ŵanyawo na kuŵapa chakurya na munkhwala usange mphakwenelera, nangauli kuchita nthena nkhwakofya. Nyengo zinyake, ŵabali aŵa ŵakuchita kukhwaŵa pasi kuti ŵajivikilire para ŵanthu ŵamba kulasana. Tikunotha chomene na ŵabali ŵithu aŵa, awo “ŵaŵika umoyo wawo pangozi” chifukwa cha Ŵakaboni ŵanyawo.—Ŵaroma 16:4.

Pakuti gas na magesi kulije, ŵadumbu ŵachikanga mu msumba wose uwu ŵakuphika chakurya pawaro pa moto wa nkhuni. Chakurya ichi chikupelekeka ku ŵapharazgi ŵachekuru na ŵakupendera. Ŵanandi ŵataya nyumba zawo, magalimoto, na katundu, kweni mbakukondwa kuwona umo ŵabali na ŵadumbu ŵawo ŵakuŵapwelelera kweniso chitemwa icho ŵakuŵalongora.

Awo ŵasamuka mu nyumba zawo ŵakulutilira kuchita vinthu vyauzimu mwakusambira Baibolo pamoza na kupharazga para mwaŵi wasangika.

Kufika pa March 22, 2022, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 10 ŵali kufwa

• Ŵapharazgi 27 ŵali kupwetekeka

• Ŵapharazgi 33,180 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu chenechichi

• Nyumba 78 zili kusakazikirathu

• Nyumba 102 zili kunangika chomene

• Nyumba 484 zili kunangika pachoko waka

• Nyumba ya Ufumu yimoza yili kusakazikirathu

• Nyumba za Ufumu zinayi zili kunangika chomene

• Nyumba za Ufumu 18 zili kunangika pachoko waka

• Ku Ukraine kuli kupangika Makomiti 27 Ghakovwira Para kwachitika Soka agho pasono nthena ghakugwira ntchito

• Makomiti Ghakovwira Para kwachitika Soka ghali kovwira ŵapharazgi 25,069 kusanga malo ghakukhala ghakuvikilirika

• Ŵapharazgi 14,308 awo ŵali kuchimbilira ku vyaru vinyake ŵakovwirika na Ŵakaboni ŵanyawo