Chachitima ntchakuti kufika pa March 29, 2022, ŵabali na ŵadumbu ŵithu ŵanyakeso 7 ŵali kufwa mu msumba wa Mariupol. Pasono, wose pamoza ŵabali na ŵadumbu ŵithu awo ŵali kufwa ku Ukraine ŵakukwana 17.

Makomiti Ghakovwira Para Kwachitika Soka ku Ukraine ghakuŵikapo mtima chomene kugwira ntchito yakupeleka wovwiri, ŵabali ŵakufika na pakuŵika maumoyo ghawo pangozi kupenja Ŵakaboni ŵanyawo mu vigaŵa ivyo nkhondo yasuzga chomene.

Mwachiyelezgero, ŵabali awo ŵali mu Makomiti Ghakovwira Para Kwachitika Soka ŵakufiska kupeleka chakurya, munkhwala, na vinyake vyakukhumbikwa mu vigaŵa ivyo nkhondo yanunkha chomene, nga nkhu Kharkiv, Kramatorsk, na Mariupol. Yumoza mwa awo ŵakuteŵetera mu Komiti iyi wakwenda zuŵa lililose mtunda wa makilomita 500, kujumpha mu malo ghanandi agho ŵasilikari wakusecheranga ŵanthu, kukapeleka chakurya na munkhwala ku ŵapharazgi pafupifupi 2,700.

Makomiti Ghakovwira Para Kwachitika Soka ghakunozgaso mendero gha ŵabali na ŵadumbu ŵithu kuti ŵafumemo mu vigaŵa ivyo muli nkhondo. Mubali munyake uyo wali mu Komiti Yakovwira Para Kwachitika Soka, ku Chernihiv wakuti: “Ŵasilikari ŵati ŵamba kuphuliska nyumba za ŵanthu, vikaŵa vyakumanyikwirathu kuti chikaŵa chakofya chomene kulutilira kukhala mu msumba. Pakuti magesi na intaneti kukaŵavya, apo ŵakaphuliskanga mabomba, ŵalara ŵakachimbilira mu msumba mwaluŵiro kukamanyiska ŵapharazgi awo ŵakaŵa mu tuvipinda twa pasi kuti pali magalimoto agho ghangaŵawovwira kuti ŵachimbire mu msumba uwu.”

Mwenecho wa magalimoto agha wakazomera kugwiliskira ntchito magalimoto ghake ghakurughakuru na mabasi, ndipo wakenda maulendo 9, kuti waponoske ŵabali na ŵadumbu ŵithu 254 ku Chernihiv. Panyengo yinyake, wakafika na pakunozga msewu mwakugwiliskira ntchito mashini ghakuru mwakuti basi yijumphe makora. Ŵabali ŵithu ŵakuwonga chomene wovwiri uwu.

Nase tikulira nawo lumoza awo ŵataya ŵakutemweka ŵawo mu nyengo ya nkhondo iyi, iyo pasono nthena yikulutilira. Tose tikulindilira mwakunweka kufiskika kwa layizgo ilo tikulisanga mu Mazgu gha Chiuta Baibolo, lakuti kuzamuŵavya nyifwa na kulira.—Chivumbuzi 21:3, 4.

Kufika pa March 29, 2022, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 17 ŵali kufwa

• Ŵapharazgi 35 ŵali kupwetekeka

• Ŵapharazgi 36,313 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu chenechichi

• Nyumba 114 zili kunangikirathu

• Nyumba 144 zili kunangika chomene

• Nyumba 612 zili kunangika pachoko waka

• Nyumba ya Ufumu yimoza yili kusakazikirathu

• Nyumba za Ufumu 7 zili kunangika chomene

• Nyumba za Ufumu 23 zili kunangika pachoko waka

• Makomiti Ghakovwira Para Kwachitika Soka 27 ghali kwimikika ku Ukraine

• Ŵapharazgi 34,739 ŵakawovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 16,175 awo ŵali kuchimbilira ku vyaru vinyake ŵakovwirika na Ŵakaboni ŵanyawo