Chachitima ntchakuti ŵabali na ŵadumbu ŵithu ŵanandi ŵafwa chifukwa cha nkhondo iyo yikulutilira ku Ukraine. Kufika pasono, Ŵakaboni ŵa Yehova ŵakukwana 28 ndiwo ŵali kufwa.

Kuyana na malipoti gha nkhani, mu masabata ghakwambilira gha nkhondo iyi, mu matawuni ghapafupi na Kyiv ndimo nkhondo yikanunkha chomene. Pa ŵapharazgi pafupifupi 4,900 awo ŵakakhalanga mu chigaŵa ichi, ŵakujumpha 3,500 ŵasamukira ku vigaŵa ivyo vinthu viliko makora.

Pulikaniko vinyake ivyo vikachitikira ŵabali ŵithu, ivyo vikulongora kuti ŵabali awo ŵali mu vigaŵa ivi ŵakulutilira kuŵa na chipulikano chakukhora nangauli ŵakujumpha mu nyengo zakusuzga chomene.

Oleksandr, uyo ni mubali mulara mu tawuni ya Makariv, wakachimbilira ku chigaŵa cha pakati ku Ukraine uko vinthu vili makorako. Ndipouli, chifukwa chakuti wakafipiranga mtima ŵapharazgi ŵa mu kagulu kake ka uteŵeti awo chikaŵa chakusuzga kuyowoyeskana nawo, wakawelera na kulutaso ku tawuni yeneyiyi kuti wakaŵapenje nangauli nkhondo yikaŵa mukati. Iyo wakuti: “Nkhumanya kuti Yehova wakuwona kuti ŵateŵeti ŵake mbakuzirwa chomene. . . . Nkhati nafika pa luŵaza lwa nyumba ya mupharazgi munyake, nkhasanga kuti yaphuliskika na bomba. Chijaro cha kachipinda kapasi chikajalika, ndipo palije uyo wakazgoranga apo nkhachemanga. Wofi ukanikora chomene.” Oleksandr wakaswa waka chijaro chakunjilira mu kachipinda aka na kusanga kuti muli ŵanthu awo ŵali makora waka. Apa wakaŵasanga ŵapharazgi wose, pamoza na ŵachibali ŵawo awo ŵakaŵa Ŵakaboni yayi.

Yaroslav uyo njumoza wa ŵapharazgi awo ŵakabisama mu kachipinda kapasi aka wakati ŵakabisama kwa mazuŵa 8. Iyo wakati: “Zuŵa lililose tikaryanga waka mabisiketi na kumwa maji. Kweni tikaŵazganga Baibolo na mabuku ghithu, kulomba, na kukhozgana. Nkhati napulika Oleksandr wakuchema zina lane, nkhawonanga nga kuti mbasilikari ŵakukhumba kuzakanitora. Nkhatenge waka ine mbwenu kwamara. . . . [M’malo mwake,] wakiza kuzakatiponoska tose. Tikuwonga chomene Yehova chifukwa cha kutipa mbumba yauzimu yachitemwa nthena, iyo yili na ŵanthu awo ŵakutilombera nanga nkhuŵika umoyo wawo pangozi kuti ŵatiponoske.”

Pylyp na mubali munyake ŵakasankha kuti ŵalute kukapeleka chakurya ku ŵabali awo ŵakukhala mu tawuni ya Borodianka. Pa March 17, apo ŵakaŵa mu galimoto kuluta ku tawuni iyi, ŵasilikari ŵakapoka galimoto ya Pylyp na kutora chakurya. Kufuma apo, ŵasilikari aŵa ŵakakaka ŵabali ŵaŵiri aŵa, kuŵajara kumaso, na kuluta nawo mu kachipinda kapasi pamoza na ŵanalume ŵanyake 7. Pamanyuma pa mazuŵa ghaŵiri, ŵakaŵasamuskira mu selo yinyake iyo ŵalinda ŵakaŵatimba usiku wose. Pylyp wakuti: “Nkhamanyanga yayi usange niponenge. Nkhalomba kwa Yehova kuti wanovwire kulutilira kugomezgeka.”

Ulendo unyake apo wakatimbikanga, Pylyp wakamba kulomba mwakukwezga kulombera ŵadumbu ŵachekuru awo ŵakaŵavya chakurya, kuti mbumba yake yiŵe yakuvikilirika, kweniso kumuwonga Yehova chifukwa cha vyaka ivyo wakakondwanga kumuteŵetera. Mulinda wakaweleraso nayo ku selo yake, ndipo uku mubali uyu wakalutilira kulombera ŵasilikari kuti ŵapulikiske kuti iwo mbanthu ŵakofya yayi. Ŵabali aŵa ŵakamba kupharazgira ŵalinda. Kwa mazuŵa ghaŵiri, ŵakafiska kupharazgira mulinda waliyose uyo wakizanga kuzakaŵalinda. Chinyakeso ntchakuti, yumoza wa ŵanalume awo ŵakajalirika wakanweka na uthenga wa mu Baibolo. Wakaŵawonga ŵabali aŵa. Pa March 27, ŵabali aŵa na mwanalume uyo wakanweka na uthenga wa mu Baibolo ŵakafumiskika.

Svitlana, uyo ni mudumbu wambura kutengwa ku Bucha, wakatondeka kuchimbira mu chigaŵa chake icho mukaŵa nkhondo kwa masabata ghaŵiri. Iyo wakuti: “Apa ndipo nkhapulikiska kuti mtende wakufuma kwa Yehova ngwakuzirwa chomene. Kuŵa na mtende wa Chiuta chikung’anamura waka kuti nyengo zose timanyenge chakuchita yayi. Kweni para palije icho tingachitapo pa masuzgo ghithu, apo ndipo tikuthemba chomene Yehova.”

Apo wakalutanga ku chigaŵa icho vinthu viliko makora ku Ukraine, Svitlana wakapharazgira mwanakazi munyake na muphwa wake. Ŵakafika ku chigaŵa icho vinthu viliko makora ndipo mbumba ya Ŵakaboni yikaŵapokelera. Mbumba ya Ŵakaboni iyi yikaŵapokelera wose Svitlana pamoza na mwanakazi kweniso muphwa wake na kuŵapa malo ghakugona. Zuŵa lakulondezgapo, mwanakazi uyu wakaluta ku maungano gha mpingo ndipo wakapempha Baibolo na mabuku ghithu. Svitlana wakulutilira kuyowoyeskana na mwanakazi uyu.

Kufika pa April 12, 2022, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 28 ŵali kufwa

• Ŵapharazgi 48 ŵali kupwetekeka

• Ŵapharazgi 40,778 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu chenechichi

• Nyumba 278 zili kunangikirathu

• Nyumba 268 zili kunangika chomene

• Nyumba 746 zili kunangika pachoko waka

• Nyumba ya Ufumu yimoza yili kunangikirathu

• Nyumba za Ufumu 9 zili kunangika chomene

• Nyumba za Ufumu 26 zili kunangika pachoko waka

• Makomiti Ghakovwira Para Kwachitika Soka 27 ghali kwimikika ku Ukraine

• Ŵapharazgi 41,974 ŵakawovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 18,097 awo ŵali kuchimbilira ku vyaru vinyake ŵakovwirika na Ŵakaboni ŵanyawo