Pa October 9, 2022, Mubali Paul Norton, uyo ngwa mu Komiti ya Munthavi ya Britain, wakafumiska buku la mu Baibolo la—Makani Ghawemi Umo Wakalembera Mateyu mu Chipunjabi (Shahmukhi). Ŵanthu ŵakujumpha 1,300 ŵakiza pa pulogiramu iyi, ndipo ŵapharazgi ŵanyake ŵakachita kujoyina waka mu Nyumba za Ufumu mu chigaŵa chose cha ofesi ya munthavi ya Britain. Nyengo yeneyiyo buku la mu Baibolo ili likaŵa kuti munthu wangalisanga lakuchita kutegherezga waka, la pa intaneti kweniso lakuchita kupulinta.

Ŵanthu mamiliyoni ghanandi ŵa ku India na Pakistan kweniso mu vyaru vinyake ŵakuyowoya Chipunjabi. Baibolo lose la Malemba Ghakupatulika mu Mang’anamuliro gha Charu Chiphya mu Chipunjabi likafumiskika mu October 2020, ndipo lili kulembeka mu vilembo vya Gurmukhi. Kweni buku ilo lafumiskika sono ili liwovwirenge chomene awo ŵakuŵazga Chipunjabi mu vilembo vya Shahmukhi, ndipo kanandi ŵanthu aŵa ŵakutondeka kuŵazga vilembo vya Gurmukhi kweniso kupulikiska mazgu ghake. Pambere buku ili lindafumiskike, awo ŵakuŵazga Chipunjabi cha vilembo vya (Shahmukhi) ŵakagomezganga Mabaibolo gha viyowoyero vinyake nga chiyowoyero cha Urdu.

Mu vyaka ivyo vyajumpha, mabuku ghanandi gha mu Baibolo gha mu Chipunjabi (Shahmukhi) ghakafumiskika. Ndipouli, buku la mu Baibolo la Mateyu ili, ndipusu chomene kuŵazga kweniso ndambura kusuzga kulipulikiska. Chakuzirwa chomene ntchakuti, buku ili lili na zina la Yehova.

Yumoza uyo wakachitako mulimo wakung’anamura wakati: “Ŵanthu ŵangaŵa kuti ŵali kupulikapo zina la Yehova mu sumu za ku tchalitchi. Kweni chifukwa chakuti awo ŵakung’anamura Baibolo ŵali kuwuskamo zina ili mu mavesi ghanandi gha mu Baibolo, chikuŵa chakusuzga kuti ŵanthu ŵasendelere kwa Chiuta. Sono ŵaŵenge na mwaŵi wakuwona zina la Chiuta mu buku ili la mu Baibolo pa malo ghose agho likwenera kuŵa.”

Tikugomezga kuti buku la mu Baibolo ili liwovwirenge ŵabali na ŵadumbu ŵithu kuti ŵalutilire kusendelera kwa Yehova na kulumba zina lake.—Mateyu 6:9.