Pa March 17, 2020, Khoti la Apilu la England na Wales likati palije chifukwa chakupulikikwa chakususkira ivyo Khoti Likuru likadumura. Likatiso Ŵakaboni ŵa Yehova mbanangwa kulondezga ivyo Baibolo likuyowoya pa nkhani ya kusezga munthu mu mpingo wawo.

Khoti Likuru likadumura kuti mpingo uli na wanangwa kupharazga kuti membara wawo ni Kaboniso wa Yehova yayi, ndipo chipharazgo ichi chikupharazgika kuti ŵanange mbiri ya munthu yayi. Richard Spearman, uyo wakeruzganga mulandu uwu, wakati: “Ntchakuzizika yayi kuti gulu la chisopa ilo likuyezgayezga kulondezga fundo za mu Baibolo likusezga munthu uyo wabuda. Nakuti ichi ntchakupulikikwa kusezga munthu mu gulu la chisopa, usange munthu uyo wakutondeka panji wakukhumba yayi kulondezga ivyo Baibolo likuyowoya. Ndipo usange munthu wanthena ŵangamulekelera wangananga ŵanyake mu chisopa.”

Khoti lati leruzga nthena, uyo wakamangara nkhani iyi wakachita apilu ku Khoti la Apilu kuti mulandu uwu ŵawuwoneso makora. Khoti la Apilu likakana pempho ili, likati “palije chifukwa chakupulikikwa chakuchitiraso apilu,” chifukwa ivyo Khoti Likuru ladumura “ni vyaunenesko” ndipo nkhongono “zakusezgera munthu zili mu mawoko gha chisopa.”

Shane Brady, uyo ni loya wa Ŵakaboni ŵa Yehova wakuyowoyapo vya cheruzgo ichi, wakuti: “Cheruzgo ichi chikukolerana na vyeruzgo vinyake vya kumasinda vya mu makhoti gha ku England, Khoti la kuwona vya wanangwa wa ŵanthu ku Europe, na makhoti ghanyake gha apilu ku Canada, Continental Europe, na United States. Vyeruzgo ivyo vikapelekeka mu makhoti agha vikulongolerathu kuti Ŵakaboni ŵa Yehova mbanangwa kuwona usange munthu ngwakwenelera kuŵa mu chisopa chawo panji yayi.”

Ndise ŵakukondwa chomene kuti Khoti lakhozgera wanangwa withu wakulondezga fundo za mu Baibolo kuti mipingo yithu yilutilire kuŵa yakuvikilirika.—1 Ŵakorinte 5:11; 2 Yohane 9-11.