Helen Budge, ni Kaboni wa Yehova wa ku Edinburgh, Scotland, ndipo wakulaŵiska yayi. Nga umo viliri na Ŵakaboni wa Yehova wose, nayo wakupharazgira ŵanthu pamaso na pamaso yayi chifukwa cha muliri. Ndipouli ivi vindamutondeske kuchitako upharazgi wakuchemera ŵanthu ku Chikumbusko cha Nyifwa ya Yesu.

Kuti wachiteko upharazgi uwu, wakulemba manosi mwakugwiliskira ntchito chakulembera vilembo vya braille. Iyo wakuti, “Kwa ine chakulembera vilembo vya braille ichi chili nga ni phesulu na pepara.” Pamanyuma, Helen wakugwiliskira ntchito manosi gha braille kuti wazunure mwakukwezga vilembo ivi kwa msengezgana wake, uyo wakumovwira kulemba kalata yaumaliro.

Pakuti amama ŵa Helen na abuya ŵake wose ŵakaŵa Ŵakaboni ŵa Yehova, kwamba kale Chikumbusko ntchakuchitika chakuzirwa chomene pa umoyo wake. Helen wakuti nyengo zose wakukondwa kuchemerako ŵanthu ku chakuchitika ichi. Iyo wakuti “ichi chiŵenge Chikumbusko cha nambara 70 kuchitako. Chaka chilichose nkhukondwa chomene kupokera kapepara ka kuchemera ŵanthu ku Chikumbusko mu vilembo vya braille. Kapepara aka nkhukaŵazga kuti nikapulikiske makora. Pamanyuma nkhughanaghanira ŵanthu awo ningaŵachemerako ku Chikumbusko.”

Kwali vinthu vili wuli, Ŵakhristu ŵakugomezgeka pa charu chose chapasi chitemwa chikuŵachiska kuti ŵachemerengeko ŵazengezgani ŵawo ku Chikumbusko cha nyifwa ya Yesu icho chizamuchitika pa Chisulo apa pa March 27.—Luka 22:19.