Mike Iwuchukwu wakapulika chiwawa cha mwana wake uyo wakasambiranga pa Intaneti, wakuchimbira kukhira masitepu kuti wakarye dankha na kupumura. Wakaghanaghana vyakuti walute kukawona chifukwa icho mwana wake wakachitanga kuchimbilira nthena, ndipo wakatenge wakumumusanga wakurya chakurya panji wakuseŵera na vidoli vyake. Kweni ivyo wakasanga mwana wake wakuchita vikamuzizika chomene.

Mike wakuti, “Nkhamusanga wakhala pasi na laputopu yake uku buku la Ivyo Mungasambira mu Baibolo, lili mu mawoko, ndipo ŵanyake ŵa ku sukulu ŵakamutegherezganga. Wakati waniwona wakati: ‘Adada, nkhuchitiska sambiro la Baibolo!’”

Melody wakakhumbanga kwambiska sambiro la Baibolo mu September 2020, apo ku sukulu yawo iyo yili ku Houston, Texas, ŵakamba kusambira pa Intaneti chifukwa cha muliri wa coronavirus. Ntheura wakalombanga kwa Yehova kuti wamovwire kusanga sambiro la Baibolo.

Mike na Octavia, ŵakakondwa chomene na ivyo wakachita mwana wawo. Mike wakulutizga kuti: “Nyengo zose Melody wakudumbiskana na ŵanyake ŵa ku sukulu vyakukhwaskana na Yehova. Kweni kumuwona wakuchitiska sambiro la Baibolo, chikaŵa chinthu chapadera chomene kwa ine na amama ŵake.”

Melody wakulutilira kusambira Baibolo mwakukhazikika na ŵanyake ŵa ku sukulu. Iyo wakuti: “Kufika sono, naŵasambizga vyakukhwaskana na Paradiso kweniso vya Yesu. Nkhukhumba kuti nawo ŵaŵe Ŵakaboni ŵa Yehova!”

Samuel Molnar, uyo wali na vyaka 9, ndipo wakukhala ku Illinois, United States, nayo wakuphalirako ŵanyake ivyo wakugomezga.

Samuel wakati wapulika vya nkhani ya mubali munyake uyo wakapharazgira mzengezgani wake uyo wakaŵa kuseri kwa mpanda wawo, nayo wakaghanaghana vyakuti wazakayezge kuchita nthena. Wati wawona musepuka uyo wakaŵa muzukuru wa mzengezgani wawo munyake wakuseŵera kuseri linyake la mpanda, wakamufumba usange wangatemwa kupulikako vya Paradiso. Musepuka uyu wakazomera, ndipo Samuel wakachimbilira mu nyumba kukatora buku lake lakuti Buku Lane la Nkhani za mu Baibolo.

Samuel wakuti: “Nkhamuphalira kuti munthazi wazamuseŵera na vinyama ndipo vizamumupweteka yayi. Kufuma apo nkhamuŵerengera nkhani yakuyowoya vya Daniyeli apo wakaŵa mu khululu la nkhalamu.”

Samuel wakalekera penepapa yayi. Wakamulembera kalata musepuka uyu yakulongosora vinthu vinyake kweniso mavidiyo agho ghakusangika pa jw.org. Ŵasepuka ŵaŵiri aŵa ŵakapangana kuti ŵazamuŵerengera lumoza nkhani yinyake ya mu Baibolo para ŵazakawonanaso.

Samuel wakakondwa chomene na ivyo vikachitika, ndipo sono ngwakukhumbisiska kuti wafiske chilato chake chinyake. Iyo wakuti: “Nkhukhumba kughamanya makora mathirakiti ghose agho ghali pa chigaŵa cha Ivyo Tikupharazgira, mwakuti chiŵe chipusu kusambizgira ŵanthu.”

Ŵadumbu ŵawukirano ŵatatu ku Houston, nawo ŵafiska chilato chawo chauzimu cha kwamba upayiniya wakanyengo apo ŵakaŵa pa holide.

Mu August, Joselyn Horta, uyo wali na vyaka 13; Melanie Alvarez, uyo wali na vyaka 12; na Chloe Rodriguez, uyo wali na vyaka 10, ŵakajoyinana pa pulogiramu yinyake ya pa kompyuta (videoconference) kuti ŵalembe makalata. Sabata yiliyose ŵakachitanga nthena kwa maulendo pafupifupi 5 ndipo ŵakambanga 7:00 mulenji.

Joselyn wakuti: “Tikadumbiskananga na kurya chakurya nyengo yimoza ndipo para yakwana hafu 7 mulenji, tikambanga kulemba makalata.” Nyengo zinyake yumoza wawo wakagonerezganga, ndipo ŵanyake ŵaŵiri ŵakalembanga meseji yaubwezi yakuti: “Mwawuka wuli! Wukani! Tiyeni tiyambeko kupharazga!”

Ivyo ŵakuchita ŵasungwana aŵa vikukhozga iwo pera yayi, kweni vikukhozgaso ŵabwezi na ŵamumbumba zawo. Amama ŵa Joselyn, a Alicia ŵakuti: “Nyengo zinyake nkhajipulikanga kuti nilije nkhongono zakuti nipharazgire. Kweni para nawona Joselyn wakupharazga, mbwenu nkhajikumbuskanga kuti, ‘Nane nkhukhumba kuchitako mulimo wakupharazga!’”

Yehova wakukondwa para wakuwona ŵawukirano ŵakugomezgeka awo ŵakuyezgayezga kuchita chilichose icho ŵangafiska kuti ŵachiteko mulimo wakupharazga mu nyengo ya muliri iyi.—Zintharika 27:11.