Pa September 26, 2024, chimphepo chikuru chakuchemeka Helene, chikapuka ku Gulf Coast ku Florida, U.S.A. Chimphepo ichi chikiza na vula ndipo chikaputanga pa sipidi ya makilomita 225 pa ora (140 mph). Ndipo pa September 27, chimphepo ichi chikalutilira ku Georgia ndipo chikaputanga pa sipidi yakujumpha makilomita 95 pa ora (59 mph). Zuŵa lakulondezgapo, chimphepo chikalutilira kumpoto na kufika ku South Carolina, uko chikapangiska kuti paŵe mphepo zikuruzikuru zitatu. Apo chimphepo ichi chikafikanga ku North Carolina, mu misumba yinandi kukawa vula ya masentimita yakujumpha 90.

Mphepo na vula yikuru ya Helene yikapangiska kuti maji ghatutuke mu malo ghanandi na kunanga nyumba, mabizinesi, na misewu. Ŵanthu ŵakujumpha 1 miliyoni ŵalije magesi. Ndipo ŵanthu pafupifupi 180 ŵali kufwa.

• Chachitima ŵabali ŵatatu ŵali kufwa

• Ŵapharazgi 7 ŵakapwetekeka pachoko waka

• Ŵapharazgi 1,606 ŵali kusamuka mu nyumba zawo

• Nyumba 29 zili kunangikirathu

• Nyumba 236 zili kunangika chomene

• Nyumba 779 zili kunangika pachoko waka

• Nyumba ya Ufumu yimoza yili kunangika chomene

• Nyumba za Ufumu 19 zili kunangika pachoko waka

• Ŵalaŵiliri ŵadera na ŵalara ŵa mpingo ŵakupeleka wovwiri wauzimu ku awo ŵakhwaskika na chimphepo

• Makomiti Ghakovwira Para Kwachitika Soka ghaŵiri ghali kwimikika kuti ghadangilire pa mulimo wakupeleka wovwiri

Tili na chitima chifukwa cha ŵanthu awo ŵafwa chifukwa cha chimphepo chikuru ichi. Ndipouli, tikukhozgeka na mtende uwo Yehova watilayizga, wakuti kunthazi ŵanthu wose “wakhalenge mwakufwasa ndipo wayungwenge yayi chifukwa cha kopa soka.”—Zintharika 1:33.