Chimphepo cha chakuchemeka Hurricane Dorian icho chikamba pa September 1 m’paka pa September 3, 2019 chikasakaza vinthu vinandi chomene ku Bahamas. Pambere chimphepo ichi chindachitike, ofesi ya munthavi ya United States yikamba kunozga vyakuti pasangike wovwiri kufuma ku Florida, U.S.A. Ŵabali ŵati ŵawona kuti ŵangenda makora, ŵabali awo ŵakaŵa na maboti panji ndege ŵakaŵa ŵakunozgeka kukapeleka wovwiri. Iwo ŵakaŵa ŵamoza mwa ŵanthu ŵakwamba kwiza na wovwiri pa vilwa ivi.

Ŵabali na ŵadumbu 13 ŵakenda pa ndege maulendo ghakujumpha 300 kuti ŵafiske kwiza na wovwiri wa katundu uyo uzito wake ukaŵa matani 15 pamoza na ŵateŵeti ŵakujipeleka ŵakujumpha 700. Pakaŵaso maboti 13 gha ŵabali ŵithu agho ghakagwira ntchito pakutumizga katundu uyo uzito wake ukaŵa pafupifupi matani 90. Kanandi ulendo wa pa boti kufuma ku Florida kuluta ku Bahamas na kuwerako ukutora maora pafupifupi 12.

Manejara wa pa chiŵanja cha ndege cha Beach International Airport ku Florida zina lake Jose Cabrera, wakati “Chimphepo chikati chamara waka ndege za Ŵakaboni zikamba kuduka mu Bahamas, ndipo zikayegha katundu wakuti wovwire ŵanthu. Ŵakaboni ŵa Yehova ntchiyelezgero chiwemi chomene cha ŵanthu awo ŵakovwira ŵanyawo ndipo ŵakuchita vinandi padera pakovwira.”

Mubali Glenn Sanders, yumoza mwa awo ŵakendeskanga ndege wakati “kwa ŵanandi ŵa ise, aka nkhakwamba kuti tovwire ŵabali na ŵadumbu mwakugwiliskira ntchito luso lwithu. Vikaŵa vyakukhozga chomene kumanya kuti nangauli tikaŵa nga nkhachiŵaro kachoko kathupi, kweni tikapeleka wovwiri ku chiŵaro chinyake cha thupi icho chikaŵa kuti chapwetekeka.”—1 Ŵakorinte 12:26.

Ofesi ya munthavi ya United States yikusachizga kuti ndalama izo zikukhumbikwa pa wovwiri uwu ni madola gha ku America pafupifupi 1,750,000 ndipo ntchito iyi yizamumara pa May 1, 2020.