Pa April 7, ŵanthu ŵakujumpha 1,100 ŵakawonelera nkhani yakuchita kujambura ya Chikumbusko cha nyifwa ya Yesu mu majele ghaŵiri ku Palm Beach County, Florida. Palije Kaboni wa Yehova uyo wakatenge walutenge ku malo agha kukayowoya nkhani.

Yumoza mwa ŵabali 12 awo ŵakulutanga ku majele agha sabata yiliyose kukasambizga ŵanthu Baibolo wakati: “Tikazizwa chomene kuti vyose vikenda makora. Uwu ukaŵa ukaboni wakuti Yehova wakukhumba kuti ŵanthu aŵa ŵapulikizge nkhani ya Chikumbusko.”

Ŵabali ŵakapemphanga muliska wa majele ghaŵiri agha kuti waŵazomerezge kuti ŵakayowoye nkhani pa zuŵa la Chikumbusko ku malo agha. Kweni chifukwa cha muliri wa COVID-19, ŵabali aŵa ŵakatondeka kuluta kukayowoya nkhani. Uku ŵachali kupenja nthowa yinyake ya umo ŵangachitira, muliska yura wakapempha ŵabali kuti ŵamupe nkhani ya chikumbusko yakuchita kujambura. Ŵabali ŵakazizwa chomene. Iyo wakaŵa kuti wanozga kale vyakuti ŵanthu mu majele ghaŵiri agha, ŵakawonelere nkhani ya Chikumbusko yakuchita kujambura.

Ŵabali ŵakamupa vidiyo, kweni ŵakakhumbangaso kuti ŵamupe tumapepara twakuchemera ŵanthu ku chikumbusko kuti wakagaŵire panji kubatika kuti ŵanthu ku malo agha ŵamanye vya chakuchitika ichi. Kweni ŵakazizwaso kuti muliska yura wakaŵa kuti wabatika kale mu viwumba kumanyiska ŵanthu za nkhani ya Chikumbusko. Kufika pa April 7 ilo likaŵa zuŵa la Chikumbusko vyose vikaŵa kuti vyanozgeka mwakuti kayidi waliyose wangawonelera nkhani ya Chikumbusko.

Chikumbusko chikati chamara, muliska yura wakapempha Mabaibolo ku ŵabali kuti wakagaŵire ŵakayidi. Ndipo Mabaibolo ghose agho ŵabali ŵakapeleka ku malo agha, ghakagaŵirika ku ŵakayidi, mwakuti ŵanyake ghakaŵapeleŵera.

Tili ŵakukondwa kuti palije icho chikutondeska Mazgu gha Chiuta kuti ghafikire ŵanthu nanga ni awo wajalirika mu majele.—Mateyu 24:14.