Ungano wa chigaŵa wa mu 1922 uwo ukachitikira ku Cedar Point, Ohio, U.S.A., ngumoza mwa maungano ghambura kuluwika gha Ŵakaboni ŵa Yehova, chifukwa pa ungano uwu Mubali Joseph F. Rutherford wakachiska wose vya kupharazga Ufumu.

Ndipouli ungano uwu ngwambura kuluwika pa chifukwa chinyakeso: pakajambulika vidiyo. Kufika pasono vikumanyikwa yayi usange vidiyo iyi yichalipo.

Chithuzi chakulongora ungano wa mitundu yose uwo ukachitika mu September 1922, paliso pulatifomu na kamera yakujambulira mavidiyo gha ungano wapadera uwu. Panyengo iyo vithuzi vyakwenda ndivyo vikagwiliskilikanga ntchito chomene.

Vikuwoneka kuti pakaŵa mwaŵi wakuti vidiyo ya ungano uwu yiwoneskeke ku ŵanthu. Mwachiyelezgero, nyuzipepara yinyake mukaŵa chipharazgo cha vidiyo ya ungano uwu. Chipharazgo ichi chikachiskanga ŵanthu kuti “ŵakawonelere ungano ku nyumba kwawo. Ŵakawone ŵabwezi ŵawo, ŵakawonelere ubatizo.” Chikayowoyaposo vya nthowa yakuchitira upharazgi: “Chemani ŵazengezgani ŵinu na kuŵapharazgira mwakugwiliskira ntchito vithuzi vya pa ungano. Chemeskani vidiyo yinu sono.”

Para mungamanya uko kuli vidiyo iyi, chonde manyiskani Dipatimenti ya Myuziyamu pa MuseumDonations@jw.org panji lemberani ku World Headquarters of Jehovah’s Witnesses at 1 Kings Drive, Tuxedo Park, NY 10987. Tili na chigomezgo kuti tiyisangenge vidiyo yakulongosora mbiri yithu iyi.