Ntchito yakuzenga nyumba iyo muzamufikiranga ŵalendo yili mukati ku Watchtower Educational Center of Jehovah’s Witnesses ku Patterson, New York, U.S.A., nyumba iyi njakudikanya kaŵiri kweniso njitali ma sikweya mita 2,787 ndipo para vyose vili makora ntchito iyi yizamumara mu chihanya mu 2023. Mu nyumba iyi muzamuŵa myuziyamu iyo mukati mwake muzamuŵa vigaŵa vitatu vyakulongora vithuzi kweniso chigaŵa chimoza cha vithuzi vyakwenda, ndipo yizamuŵa yakuti yingakwana ŵanthu 1,200 pa zuŵa. Nyumba zinyakeso zinandi zikunozgeka ndipo mapayipi yakale ya maji na magesi nagho ŵakuŵikira ghanyake. Tingati pasono ntchito ya kuzenga na kunozga nyumba zinyake yakhala pachoko chifukwa pafupifupi hafu ya ntchito yose iyi yachitika kale.

Ŵabali awo ŵakulongozga ntchito iyi ŵakasangana na masuzgo chifukwa cha muliri uwu wa COVID-19. Pakuti chikaŵa chakusuzga kuti tichemeske katundu wakukhumbikwa pa kuzenga mu nyengo ya muliri iyi, ntchito iyi yikakhara pachoko kuti yiyime. Mwachiyelezgero, apa tikazenganga chigaŵa chinyake chakuzirwa chomene, chikaŵa chakusuzga kuti tisange simenti yakupangira konkiri, kweni ŵabali ŵakayezgeska kusanga vyakukhumbikwa kuti ŵamalizge kuŵika konkiri chigaŵa chikuru pa nyengo yake. Nangauli, mitengo ya visulo yikakwera chomene, kweni ŵabali ŵakafiska kugura ivyo vikakhumbikwanga pa mitengo yiwemi chifukwa ŵakapangana kale na ŵeneko.

Pa nyengo iyo waliyose wakakhalanga dankha kwayekha, ŵabali awo ŵakajipeleka kovwirapo ŵakagwiranga ntchito uku ŵali ku nyumba kwawo ndipo ivi vikawovwira kuti ntchito yakupanga mapulani yende mwaluŵiro. Pa nyengo yinyake, chikaŵa chakusuzga kukumana na ŵamazaza ŵa tawuni iyi chifukwa cha malango ghakujivikililira ku muliri, ndipo ivi vikatenge vipangiskenge ntchito iyi kuchedwa. Ndipouli, chifukwa chakuti madipatimenti gha pa Beteli ghakagwira ntchito mwakukolerana na ŵamazaza ŵa boma, komiti ya vyakuzenga mwakovwirika na ŵabali ŵakujipeleka yikazomerezgeka kwamba ntchito pa nyengo yake kwizira pa videoconference.

Pakasinthaso vinyake pa nkhani yakukhala kwatekha, ndipo awo ŵakaŵa kuwaro kwa Beteli ŵakaleka kuzomerezgeka kunjira, ntheura ivi vikasazgirakoso waka masuzgo. Kweni cha mu September 2020, tikambiraso kuchema ŵabali na ŵadumbu ŵakujipeleka kuti ŵize kuzakakhala muno mukati na kutovwirako ntchito zakupambanapambana.

Mudumbu Jennifer Paul wakachemeka kuzakawovwirapo pa mulimo uwu mu nyengo ya muliri iyi. Pakuyowoyapo pa mulimo wakuzenga, iyo wakati: “Nkhuyitemwa chomene ntchito. Kweni ni ntchito pera cha, nkhutemwaso ŵanthu. Nkhajiwonera nekha umo gulu la Yehova likuchitira vinthu, kweniso umo Yehova wakulilongozgera.”

Pasono, ŵanthu ŵakujipeleka 440, pamoza na awo ŵakukhala penepano pa Beteli pafupifupi 350, ŵakugwira ntchito ya kuzenga na kunozga nyumba yakufikirako ŵalendo ku Patterson. Ŵabali na ŵadumbu ŵithu ŵakulutilira kuwona umo Yehova wakuŵawovwilira kuti ntchito iyi yilutilire kwenda makora.—1 Midauko 29:16.