Joseph F. Rutherford, uyo panyengo iyo wakaŵa pulezidenti wa Watch Tower Society, wakaŵapo apo ŵakambanga kuzenga Nyumba ya Ufumu ku 1228 Pensacola Street, Honolulu, Hawaii. Umu mukaŵa mu chaka cha 1935. Nyumba iyi yikaŵa yapadera chomene chifukwa ndiyo yikaŵa yakwamba pa charu chose chapasi kumanyikwa na zina la kuti “Nyumba ya Ufumu.” Kweniso nyumba iyi yikaŵa yakuti ŵanthu ŵasoperengemo Yehova vyaka vyakujumpha 80 kunthazi. Pasono Nyumba ya Ufumu iyi yakhala vyaka 85, ndipo mukuwungana mipingo yinayi iyo yikuchita maungano mu viyowoyero 5, kusazgapo Chihawai’i Pidgin. *

Pambere muliri wa COVID-19 undambe, Nyumba ya Ufumu iyi yikaŵa kuti ŵayinozgaso. Ŵabali ŵithu ŵakachema ŵanthu ŵa ku chigaŵa ichi, ŵalaraŵalara ŵa boma, na mapurofesa kuti ŵize kuzakawona Nyumba ya Ufumu iyi kufuma pa February 11 m’paka 15, 2020. Ŵalendo aŵa ŵakaŵa na mubali uyo wakaŵalongozganga pakuwona Nyumba ya Ufumu iyi, ndipo wakaŵawoneska vinthu vyakupambanapambana vyakulongora mbiri ya Nyumba ya Ufumu iyi. Paumaliro ŵalendo aŵa ŵakategherezga nkhani zakulongosora mulimo wa Ŵakaboni ŵa Yehova. Pa February 16, Mubali David H. Splane wa mu Wupu Wakulongozga wa Ŵakaboni ŵa Yehova, wakadumba nkhani yakupatulira nyumba iyi kwa Yehova.

Mudumbu munyake uyo wakawovwirapo pakunozgekera chakuchitika cha padera ichi, wakati: “Nangauli tikachema ŵanthu kuti tizakaŵapharazgire yayi, kweni tikuwona kuti ŵanthu ŵanandi ŵakamanya unenesko pakuyowoya vya Ŵakaboni ŵa Yehova.”

Chakuchitika chapadera ichi, chikawovwira ŵabali na ŵadumbu ŵithu ku virwa vya ku Hawaii, kuti ŵayimanye makora mbiri ya gulu la Yehova, kweniso kuti ŵajiwonere ŵekha kufiskika kwa mazgu ghakuti: “Mu virwa vya mu nyanja ŵazamuchindika zina la Yehova, Chiuta wa Israyeli.”—Yesaya 24:15