Chimoza mwa vyakuchitika vyapadera mu mbiri yithu, chikachitika vyaka 100 kumasinda uku pa September 5-13, 1922, apo Ŵakaboni ŵa Yehova ŵakaŵa na ungano wa chigaŵa wa mazuŵa 9 ku Cedar Point, Ohio, U.S.A. Ŵanthu ŵakufuma ku vigaŵa vinandi vya United States, Canada, na Europe ŵakiza pa ungano uwu. Pa avereji, zuŵa lililose pakizanga ŵanthu 10,000, ndipo nkhani zikadumbikanga nyengo yimoza mu viyowoyero pafupifupi 11.

Pajulika myuziyamu yiphya ku likuru lithu la Ŵakaboni ŵa Yehova, iyo yikulongora vinthu vya pa ungano wapadera uwu mu mbiri yithu, ndipo yikulongoraso umo ungano uwu ukakhwaskira ntchito ya kupharazga. Pasono awo ŵakuzomerezgeka kuluta ku myuziyamu iyi ni awo ŵakuteŵetera pa Beteli, ndipo para ŵanthu ŵambaso kuzomerezgeka kuzakawona malo ku maofesi ghithu, ŵanyake wose ŵazamuŵa na mwaŵi wa kuluta ku myuziyamu iyi.

Chinthu chakukondweska chomene pa ungano wa ku Cedar Point chikachitika pa September 8. Pa zuŵa ili, ŵanthu pafupifupi 8,000 ŵakazura mu holo ya ungano, kufupi na Nyanja ya Erie. Ŵakiza kuzakategherezga nkhani ya Mubali Joseph F. Rutherford, ya mutu wakuti “Ufumu wa Chiuta.”

Wati wadumba nkhani iyi kwa maminiti 90, Mubali Rutherford wakakwezga mazgu ghake apo wakafumbanga ŵategherezgi usange ŵakugomezga kuti Khristu wakuwusa. Nyengo yeneyiyo mzinda ukazgora mwakukwezga kuti: “Enya!” Mbwenu Mubali Rutherford wakati: “Muli na mulimo wa kuphalirako waliyose vya nkhani iyi. Ntheura, pharazgani, pharazgani, pharazgani.” Wati wamara waka kuyowoya ivi, ŵakazungulura salu iyo pakalembeka kuti: “Pharazgani Themba na Ufumu wake.”

Awo ŵakaŵa pa ungano uwu ŵati ŵapulika mazgu agha, ŵakakhuka chomene kuchita mulimo wa kupharazga. Nakuti ŵanandi mwa ŵanthu aŵa ŵakaŵa kuti ŵakuchitako kale mulimo wa kupharazga, kweni nkhani ya Mubali Rutherford yikaŵakhukiska kuti ŵasazgireko mwamphu wawo apo ntchito ya kupharazga nyumba na nyumba yikalutanga panthazi. Mudumbu Ethel Bennecoff, uyo wakaŵa na vyaka pafupifupi 30 pa nyengo iyo, wakati nkhani iyi yati yamara waka, Ŵasambiri ŵa Baibolo “ŵakaŵa na mwamphu chomene kweniso chitemwa chawo chikakura kuluska kumasinda kose.” Mudumbu Odessa Tuck, uyo wakaŵa na vyaka 18 mu 1922, wakati: “Nkhakhumbanga kuŵa nga ni Yesaya, uyo wakati: ‘Ndine pano! Nitumani!’”

Pati pajumpha mazuŵa ghaŵiri kufuma apo Mubali Rutherford wakadumbira nkhani yake, wupu wa International Bible Students Association ukazomerezga chigamuro chinyake. Chigaŵa chinyake cha chigamuro ichi chikatenge: “Pakuŵa gulu la Ŵakhristu ilo likuŵikapo mtima kupulikira na kulondezga Fumu na Mponoski withu Yesu Khristu, tikukana kunjizgikamo mu nkhondo, viwoneskero, kulimbana na boma, panji kuchitako vyachiwawa vya mtundu uliwose; ndipo tikukanaso ukhuluku panji kupusika ŵanthu mwa kugwiliskira ntchito Baibolo mwakubudika. Nyengo zose tikukhumba kuŵa pamtende.” Chigamuro ichi chikapangiska kuti Ŵasambiri ŵa Baibolo ŵapambane chomene na visopa vinyake ivyo vikakhozgeranga Nkhondo Yakwamba ya pa Charu Chose, ndipo vikaŵaso vyakunozgeka kuzakachita mwakuyana waka pa Nkhondo Yachiŵiri ya pa Charu Chose.

Nkhani ya mu Gongwe la Mulinda la June 15, 1922, yikati: “Mulimose umo vingaŵira, tichitenge chilichose icho tingafiska kuti ungano wa chigaŵa wa mu 1922 uzakaŵe wapadera chomene. . . . Tikulomba kuti mphanyi wazakaŵa ungano wambura kuluwika ku ŵanthu masauzandi ghanandi awo ŵazamwiza.”

Chakukondweska ntchakuti, chilato ichi chikafiskika nadi. Nangauli pajumpha vyaka 100, kweni Yehova wachali kutumbika ntchito ya kupharazga vya Themba na Ufumu wake.—Mateyu 24:14.