Chifukwa cha muliri wa COVID-19, tikayima dankha kuchita maungano gha chigaŵa maso na maso mu March 2020. Chaka ichi ungano wa chigaŵa uwu wa mutu wakuti ‘Lutilirani Kuzikira’! uchitikenge pa charu chose chapasi mu malo ghakujumpha 6,000, mu viyowoyero vyakujumpha 500. Ungano wakwamba kuchitika maso na maso ukachitika kwamba pa May 12 m’paka pa 14, 2023.

Pa ungano uwu pakaŵa ŵanthu ŵakujumpha 1,800. Ungano uwu ukachitikira ku Newburgh uko kuli malo ghakuchitirako ungano wa Ŵakaboni ŵa Yehova ku Newburgh, New York, U.S.A. Mudumbu Khrystine Torres wakaŵapo pa ungano uwu. Iyo wakuti: “Cheyamani wati wayowoya kuti: ‘Tamupokelerani,’ ŵanthu wose ŵakakuŵa mawoko mwakukondwa. Waliyose wakaŵa wakukondwa chomene kuti ŵasanganaso pamoza.” Mubali Duane Smith, uyo nayo wakaŵapo pa ungano uwu wakayowoya kuti: “Pakaŵa chiwawa chakulongora kuti ŵanthu ŵakondwa chomene. Vikachita kuwonekerathu kuti ŵabali na ŵadumbu ŵakakondwa chomene kuŵaso pamoza.”

Mudumbu Jessica Dolcemascolo, uyo wakabatizika mu nyengo ya muliri, wakaŵa kuti wandachitepo maso na maso ungano wa chigaŵa. Iyo wakalongosora kuti: “Chimwemwe, chitemwa kweniso kukondwa uko ŵanthu ŵakalongora vikaŵa nga umo vikuŵira para munthu wasanganaso na mubwezi wake uyo ŵakawonana ni kale.” Mudumbu Noemi Tinajero wali na vyaka 18 ndipo wakabatizika kukwambilira kwa chaka ichi, iyo wakayowoya kuti: “Mabanja kweniso ŵabwezi ŵakakondwa chomene. . . . Vikaŵa nga tili mu charu chiphya.”

Ŵanandi ŵakakondwa chomene na mutu wa ungano. Mubali Sam Huh wakati: “Taŵanandi vikutisuzga chomene kuzikira. Ntheura ukaŵa mutu wa panyengo yake kutikumbuska kuti tikwenera kuyezga Yehova pa nkhani ya kuzikira.” Mudumbu Frenchie Smith wakayowoya kuti: “Ungano uwu wanisambizga kumanya umo kuzikira kukukhwaskira vigaŵa vyose vya umoyo wane. Ungano wose ukaŵa wakukhozga chomene.”

Wose awo ŵakaŵapo pa ungano wakwamba uwu, uwo ukachitikira ku Newburgh, New York, ŵakakhozgeka chomene. Nase pamoza na ŵanthu mamiliyoni ghanandi pa charu chapasi, tikulindilira mwakunweka kuti tizakakhozgeke mu myezi yikwiza iyi na chiphikiro chauzimu.—Salimo 122:1.