Ŵakaboni ŵa Yehova ŵanandi ŵakukondwa kuchita upharazgi wa makalata. Ivyo vikachitika ku United States vikulongora waka kuti nthowa iyi nayo yikovwira chomene pakuphalirako ŵanji uthenga wakukhozga wa mu Baibolo.

Mudumbu Carlee, wa vyaka 13, ku Blue Ash, Ohio, wakawamo kuti upharazgi wa makalata ngwakovwira nadi wati wawona umo munthu munyake wakachitira wati wapokera kalata yake.

Mise yinyake, Carlee wakaŵa pawaro pa nyumba yakwake, ndipo wakawona munthu munyake uyo wakaŵa pa njinga yamoto wakwiza kufupi na nyumba yakwake. Munthu uyu wakakhira pa njinga yake uku wali na nevulupu mu mawoko, ndipo wakachemerezga kuti: “Ni njani wakanitumira kalata iyi?” Carlee wakamanya kuti kalata iyi ndiyo wakalemba apo wakachitanga upharazgi wa makalata.

Apo ŵapapi ŵa Carlee ŵakizanga kuti ŵamovwireko mwana wawo, Carlee wakazgora mwachikanga kuti, “Ndine nkhalemba.”

Iyo na ŵapapi ŵake ŵakazizikika apo munthu uyu wakati, “Kalata iyi ndiyo nkhakhumbikwiranga nadi pa nyengo iyi!” Munthu uyu wakalongosora umo uthenga wa mu kalata iyi ukamukhozgera apo wakasuzgikanga na phukwa chifukwa cha muliri uwu. Iyo wakalongosoraso kuti wataya mubali wake mwasonosono, ndipo kalata ya Carlee yikamupembuzga pa nyengo yakusuzga iyi.

Munthu uyu wakamalizga na mazgu ghakuti: “Kuleka yayi kulembera ŵanthu makalata. Makalata ghinu yakuŵakhozga chomene ŵanthu, nanga vingaŵa kuti ŵazgora panji yayi.”

Pasono Carlee waŵikapo mtima chomene kulutilira kulembera makalata ŵazengezgani ŵake. Iyo wakuti: “Nkhakondwa chomene kuti Yehova wakanigwiliskira ntchito kukhozga munthu munyake. Ivyo tikulemba vingawovwira nadi kuti ŵanthu awo ŵakukhumbikwira wovwiri ŵakhozgeke.”

Mudumbu Myrna Lopez, ku Center, Texas, wakajifumbanga usange makalata ghake ghakovwira munthu waliyose, kweni mubali wake munyake wakakumana na chakuchitika chinyake. Myrna wakapulika kuti muphwa wake wajalirika mu jele. Wakaghanaghana vyakuti wamulembere kalata muphwa wake uyu, uyo kumasinda uku apo wakaŵa mwana wakalutapo ku maungano ghithu, ndipo mu kalata iyi wakamusimikizgira kuti Yehova wandamuluwe.

Muphwa wa Myrna uyu wakazgora kalata iyo wakapokera. Wakalongosora kuti wati wajalirika mu jele wakamba kwenjerwa chomene ndipo wakawonanga kuti umoyo ulije phindu. Pasono apo wali mu jele, wamba kughanaghanira umo vinthu vikaŵira apo wakaŵa muchoko, ndipo wali kwamba kuŵerenga Baibolo na kulomba kwa Yehova. Iyo wakati kalata iyo Myrna wakamulembera likaŵa zgoro la malurombo ghake, kweniso ukaboni wakuti Yehova wachali kumughanaghanira.

Mudumbu Natalie Bibbs, wa ku Norcross, Georgia, wakapokera kakalata kufuma kwa mwanakazi munyake uyo wakasanga kalata yake apo wakachimbiranga mu msewu. Mwanakazi uyu wakawona kalata yapindika ndipo yili musi mwa msewu, pakwamba wakayijumpha waka. Kweni pa vifukwa vyambura kumanyikwa makora, wakawelera na kukatora kalata iyi.

Mwanakazi uyu wakalembera Natalie kuti: “Kuyowoya unenesko, vinthu vikaŵa makora yayi mu sabata iyi, ndipo nkhakhumbanga kuti chinyake chiwemi chichitike. Kalata iyi ndiyo yikaŵa ‘chinthu chinyake chiwemi kwa ine!’”

Natalie wakuti: “Ivyo mwanakazi uyu wakazgora vikanipa chigomezgo chose kuti vilije kanthu nthowa iyo tagwiliskira ntchito pakupharazga, Yehova wakutovwira kuti vyende makora.”

Mudumbu Laura Martinez, ku Athens, Texas, wakupeleka makalata ku ŵantchito ŵa pa shopu yinyake para ŵakwiza kuzakamupira vyakurya ku galimoto yake. Yumoza wa ŵantchito aŵa wakaphalira Laura kuti kalata iyo wakamupa yikamufika pa mtima chomene. Pakumuzgora, Laura wakamulemberaso wantchito uyu makalata ghanyake ghaŵiri ndipo pasono wakusambira nayo Baibolo.

Vyakuchitika ivi vikutikumbuska waka kuti nangauli tingaŵa kuti tikumanya makora yayi usange mbuto za unenesko izo tikuseŵa “zichitenge makora,” kweni Yehova wangagwiliskira ntchito nthowa zakupambanapambana kuti wakhozge na kuŵapa chigomezgo awo ŵali nga ni mberere.—Mupharazgi 11:6.