Ŵabali na ŵadumbu ŵithu ku Venezuela ŵakulutilira kusangana na viyezgo vyakupambanapambana. Mwachiyelezgero mu charu ichi muli masuzgo gha vya chuma na vya chiwawa, kweniso muliri wa COVID-19. Nangauli vili nthena, ŵabali ŵithu ŵakasanga nthowa zakupambanapambana kuti ŵachiteko Chikumbusko cha nyifwa ya Khristu na kuchemerako ŵanyawo.

Mwachiyelezgero, kwati kwakhala masabata ghaŵiri kuti Chikumbusko chichitike, ŵanthu ŵakamba kulasana na futi kweniso kutimbana ku La Victoria, Apure State, kufupi na charu cha Colombia. Ivi vikapangiska kuti ŵapharazgi wose mu mpingo ŵachimbilire ku Colombia. Ŵabali na ŵadumbu ŵa mu mpingo wa Arauquita ku Colombia, ŵakaŵawovwira ŵabali ŵa ku Venezuela kuti ŵajoyine na kuchitako Chikumbusko.

Mpingo unyake ku Falcón State uli ku chigaŵa icho ntchakusuzga kusanga mwaŵi wa telefoni panji intaneti. Ntheura mpingo uwu, uwo uli na ŵapharazgi 70 ukagwiliskira ntchito tumawayilesi tuchokotuchoko kuti utegherezge nkhani ya Chikumbusko.

Mudumbu munyake wakuti: “Nangauli pasono tingahagana yayi panji kuwonana maso na maso, kweni tikughapulika mazgu gha ŵabali ŵithu. Tikujipulika nga kuti tili waka pamoza.”

Kwati kwakhala mazuŵa ghachoko waka kuti Chikumbusko chichitike, mipingo yikaŵikapo mtima kumanyiska ŵanthu awo ŵakukhala ku vigaŵa vya ku mizi kuti ŵazakategherezge nkhani ya Chikumbusko. Pakanozgeka nthowa zakupambanapambana za kutegherezgera nkhani iyi. Tumapepara twa kuchemera ŵanthu ku Chikumbusko twakujumpha 3,000 tukatumizgika, ndipo vyose vikenda makora. Mwachiyelezgero ku tawuni ya Araya iyo yili mu mphepete mwa nyanja, ŵanthu ŵakujumpha 100, ŵakategherezga nkhani ya Chikumbusko kwizira pa telefoni.

Ofesi ya munthavi ya Venezuela yikapangaso ndondomeko yakuti nkhani ya Chikumbusko yikaŵe pa mawayilesi 82 na pa matchanelo 9 gha pa TV. Ŵabali pafupifupi 8,000 pamoza na awo ŵakachemeka ŵakagwiliskira ntchito nthowa izi kuti ŵachite Chikumbusko. Nkhani iyi yikaŵa mu viyowoyero vyakupambanapambana nga ni Chiguahibo, Chipemon, Chipiaroa, Chipumé, Chiwarao, Chiwayuunaiki, na Chiyekuana.

Ku Guasipati, Bolívar State, nkhani ya Chikumbusko yikeneranga kuŵikika pa wayilesi kamoza pera kwamba 6:30 namise. Nakuti chachitima ntchakuti ku chigaŵa ichi, kanandi magesi ghakuzimwanga. Apa ndikuti chikaŵa chakusuzga kuti ŵanji ŵategherezge nkhani yose ya Chikumbusko. Ndipouli, chifukwa chakuti ku siteshoni ya wayilesi iyo kukaŵa nkhani ya Chikumbusko kukaŵa suzgo linyake, yikawerezgekanga waka usiku wose mpaka maulendo 10. Ivi vikapangiska kuti ŵanthu ŵaŵe na mwaŵi wa kutegherezga nkhani yose ya Chikumbusko pa nyengo zakupambanapambana. Malipoti ghakulongora kuti ŵanthu ŵakujumpha 600 ŵakategherezga nkhani ya Chikumbusko. Mubali munyake wakati: “Yehova wakakhumba yayi kuti munyake nkhani ya Chikumbusko yimupambe!”

Nangauli ŵakusangana na “viyezgo vyakupambanapambana,” ŵabali ŵithu ‘ŵakusekelera chomene’ chifukwa ŵajiwonera ŵekha umo Yehova watumbikira kuyezgayezga kwawo kuti ŵachiteko Chikumbusko.—1 Petrosi 1:6, 7.