Pa October 30, 2021, mabuku gha mu Baibolo, gha Mateyu na Yohane ghakafumiskika mu chiyowoyero cha Mawoko cha ku Venezuela. Ŵabali na ŵadumbu ŵakujumpha 2,200 ŵakawonelera pulogiramu yapadera iyi ya kujambulirathu kwizira pa Intaneti. Mubali Miguel Guillén uyo wali mu Komiti ya Munthavi ya Venezuela, ndiyo wakafumiska mabuku agha. Ofesi ya munthavi iyi yang’anamurapo mavesi gha mu Baibolo pafupifupi 7,000 mu Chiyowoyero cha Mawoko cha ku Venezuela kwambira waka mu 2006, kweni aka nkhakwamba kuŵa na mabuku ghose ghaŵiri ghanthunthu gha mu Baibolo mu chiyowoyero ichi.

Awo ŵakang’anamura Baibolo la Mang’anamuliro gha Charu Chiphya ŵakamba kung’anamura mabuku gha Makani Ghawemi, gha Mateyu na Yohane chifukwa chakuti mabuku agha ghakulongosora chomene vya umoyo wa Yesu ndipo ghakumanyikwa chomene na ŵanthu kweniso ngambura kusuzga kung’anamura chifukwa nkhani zake zili kulongosoreka makora kuluska mabuku ghanyake gha mu Baibolo.

Mu 2003, mpingo wakwamba wachiyowoyero cha mawoko ukapangika ku Cabimas, msumba uwo uli kumanjiliro gha dazi kwa Venezuela. Mazuŵa ghano, ŵapharazgi 1,204 ŵakuteŵetera mu mipingo 53 ya chiyowoyero cha mawoko mu charu chose cha Venezuela. Ŵanthu ŵanandi ŵakumangwa ŵa ku Venezuela ŵakukhumbisiska chomene kusambira vinthu vyakukhwaskana na Baibolo kweni vikuŵasuzga kupulikiska Chiyowoyero cha Mawoko cha ku Spain, icho chikupambana na cha ku Venezuela.

Mulaŵiliri wa dera wakayowoya kuti: “Mwanalume munyake wakumangwa wakayowoya kuti wakasanga Baibolo la Chisipanishi, kweni wakati waŵerenga wakatondeka kupulika chilichose. Wakapempha Chiuta kuti wamovwire. . . . Munthu munyake wakati wamuphalira kuti wangasambira Baibolo pakugwiliskira ntchito Chiyowoyero cha Mawoko cha ku Venezuela wakakondwa chomene, ndipo mwanalume wakumangwa uyu wakazomera sambiro la Baibolo nyengo yeneyiyo.”

Ŵanthu 6 ndiwo ŵakagwira ntchito ya kung’anamura mabuku gha mu Baibolo agha ndipo ntchito iyi yikatora myezi 10 kuti yose yimare. Ŵakakumana na ŵabali ŵakukwana 7 awo ŵakafuma mu vigaŵa vyakupambanapambana vya mu charu ichi awo ŵakawona na kusanda ivyo vyang’anamulika. Ivi vikawovwira chomene awo ŵakang’anamuranga kuti ŵawoneseske kuti ivyo vyang’anamulika vikupulikikwa mu vigaŵa vyose nangauli chiyowoyero chikupambana

Chifukwa cha muliri wa COVID-19, awo ŵakang’anamuranga ŵakaŵa mu vigaŵa vyakupambanapambana ndipo ŵakagwiliranga lumoza kwizira pa videoconference. Nyengo zinyake chikaŵanga chakusuzga kung’anamura chifukwa nyengo zinyake Intaneti yikaŵanga yakusuzga. Yumoza mwa awo ŵakang’anamurako wakayowoya kuti: “Chikaŵa chipusu yayi, kweni Yehova wakatovwira kuti titonde suzgo lililose ilo likaŵapo.”

Lurombo lwithu ndwakuti ŵabali na ŵadumbu ŵithu wose ku Venezuela mphanyi ŵapindura mwakukwana na Mazgu gha Yehova mu chiyowoyero chawo agho ghali nga ni “siliva lakwengeka makora.”—Salimo 12:6.