Pa November 5, 2022, Mubali Cephas Kalinda, uyo ngwa mu Komiti ya Munthavi ya Zambia, wakafumiska Baibolo la Mang’anamuliro gha Charu Chiphya Mateyu-Chivumbuzi mu Chimbunda. Pulogiramu ya kufumiska Baibolo ili yikajambulikirathu ndipo ŵanthu ŵakujumpha 1,500 ŵakawonelera. Nyengo yeneyiyo lati lafumiskika, ŵanthu ŵakamba kupanga dawunilodi. Lakuchita kupurinta lambenge kusangika mu January 2023.

Chimbunda chikuyowoyeka chomene ku Angola na Zambia. Cha m’ma 1930, Ŵakaboni ŵa Yehova ŵakamba kusanga ŵanthu awo ŵakuyowoya Chimbunda ku Northern Rhodesia (sono nkhu Zambia). Mulimo wakung’anamura mabuku mu Chimbunda ukambika mu 2014,. Ofesi yakung’anamulirako mabuku yili ku Mongu, Chigaŵa cha kumanjiliro gha dazi kwa Zambia.

Padera pa Baibolo la Mang’anamuliro gha Charu Chiphya Mateyu-Chivumbuzi, pali Baibolo limoza pera mu chiyowoyero cha Chimbunda. Kweni ndakudura chomene ndiposo ndakusuzga kulipulikiska. Pa chifukwa ichi, Baibolo liphya ili la Mang’anamuliro gha Charu Chiphya Mateyu-Chivumbuzi, liwovwirenge chomene Ŵakaboni ŵa Yehova awo ŵakuyowoya Chimbunda pakuti ŵathembanga chomene ma Baibolo gha viyowoyero vinyake.

Pakuyowoya vya Baibolo liphya ili, yumoza wa awo ŵakang’anamurako wakayowoya kuti: “Ndakung’anamurika makora, ndipusu kupulikiska, ndakusuzga yayi kuŵerenga, ndipo chakuzirwa chomene ntchakuti unenesko wose wa mu Baibolo ukumanyikwa makora.”

Munyake uyo wakang’anamurako wakayowoyapo vyakukhwaskana na masuzgo agho ghakaŵapo na ma Baibolo ghanyake para ŵakuyowoya na ŵanthu vya Baibolo, wakati: “Zina lakuti Yehova likusangikamo yayi mu mavesi gha mu ma Baibolo ghakale agha. Kweni muli mazina gha vithokozo nga lakuti ‘Fumu Yithu Chiuta’ kung’anamura Yehova. Ichi chikapangiskanga kuti chiŵe chakusuzga ku ŵanthu kuti ŵamanye zina la Chiuta. Kweni Baibolo liphya la Mang’anamuliro gha Charu Chiphya Mateyu-Chivumbuzi mukusangika zina la Yehova mu malo ghakukwana 237.”

Tili na chigomezgo chose kuti Baibolo liphya ili liwovwirenge ŵabali na ŵadumbu awo ŵakuyowoya Chimbunda kuŵa paubwezi na Yehova na kukhozga chipulikano chawo mwa iyo.—Yakobe 4:8.