Kwamba pa April 13 kufika pa April 27, 2024, Ŵakaboni ŵa Yehova ŵa mu vigaŵa vinandi ku Zimbabwe ŵakachitako upharazgi wapadera wakupharazgira ŵanthu awo ŵakuyowoya Chitonga cha ku Zimbabwe. Ŵanthu pafupifupi 300,000 awo ŵakuyowoya Chitonga ku Zimbabwe ŵakukhala ku malo gha ku mizi mu Boma la Binga, kumpoto chakumanjiliro gha dazi. Ntchakusuzga chomene kufikira ŵanthu mu vigaŵa ivi chifukwa kuli waka Ŵakaboni pafupifupi 300 awo ŵakuteŵetera mu mipingo 8 ya Chitonga.

Upharazgi wapadera uwu ukenda makora chomene. Mwachiyelezgero, ku mpingo unyake, ŵanthu ŵakukwana 77 ŵakiza ku maungano gha kuumaliro kwa sabata mu sabata yakwamba ya upharazgi wapadera uwu. Sabata yakulondezgapo pakiza ŵanthu ŵakunweka 126 ndipo masambiro gha Baibolo ghakujumpha 2,000 ghakambika.

Zuŵa linyake ŵabali ŵithu ŵakafika panyumba yinyake, ndipo ŵakasangapo mama na ŵana ŵake. Kweni ŵabali ŵakapempha kuti ŵadumbiskane na dada wa mbumba iyi. Dada uyu wati wafika, wakaphalira ŵabali aŵa kuti ndiyo ni fumu mu muzi uwu. Wakaŵawonga ŵabali ŵithu chifukwa cha kuyowoya dankha na iyo ndipo wakati ivi vyalongora kuti ŵakumuchindika. Fumu iyi yikakondwa chomene apo yikaŵalongoranga ŵabali ŵithu Baibolo lake la Chitonga cha ku Zimbabwe, ndipo ŵabali ŵakayilongora umo tikusambilira na ŵanthu Baibolo. Pamanyuma ŵakapangana vyakuti ŵalutilire kusambira Baibolo. Fumu iyi yikaŵazomerezga ŵabali ŵithu kuti ŵangapharazgiraso ŵanthu ŵanyake mu muzi wake.

Ulendo unyake ŵabali ŵaŵiri ŵakakumana na mwanalume munyake uyo nayo wakatenge ni Kaboni wa Yehova. Mwanalume uyu wakati Ŵakaboni ŵakapharazgira adada ŵake mu chaka cha 1993. Adada ŵake aŵa ŵakamba kusambira Baibolo kweni ŵakatondeka kulutizga chifukwa cha kusamukasamuka. Mu zuŵa lakulondezgapo, ŵabali ŵithu ŵakaŵikapo mtima kuti ŵakakumane na adada ŵa mwanalume uyu ndipo ŵakenda mtunda kwa ora limoza na hafu kuluta ku chikaya chawo. Adada ŵa mwanalume uyu ŵakakondwa chomene kuwona ŵabali, ndipo ŵakaŵaphalira kuti zuŵa leneliro iwo na muwoli wawo ŵalombanga kuti mphanyi Ŵakaboni ŵiza pa nyumba pawo. Mbumba yose yikazomera kusambira Baibolo, ndipo wose ŵakasangikapo pa maungano gha mukati mwasabata, nakuti ŵakachemerako na mzengezgani wawo wuwo.

Mudumbu munyake zina lake Alicia wakasangana na mwanakazi munyake muchekuru uyo wakazomera kwiza ku maungano wati wamucherako. Apo Alicia wakaluta kuti wakamutore, wakasanga kuti wanozgeka kale kweniso kuti nayo wakachemerakoso mubwezi wake kuti ŵalutire lumoza. Maungano ghati ghamara, mwanakazi muchekuru uyu wakati: “Ntchakuwonekerathu kuti Chiuta wali namwe mwaŵanthu imwe. Mwanilongora chitemwa na lusungu ndipo ivi vyanipa khumbo lakuti nizakizeso.”

Tikukondwa pamoza na ŵabali kweniso ŵadumbu withu awo ŵakuyowoya Chitonga cha ku Zimbambwe chifukwa chakuti upharazgi wapadera uwu ukenda makora. Ivi vikutisimikizgira waka kuti pachali ŵanthu ŵanandi awo ŵakukhumba kupulika makani ghawemi apo tikulutilira kupharazga mu vigaŵa vyose vya pa charu chapasi.—Mupharazgi 11:6.