Pa April 10, 2022, Mubali John Hunguka, uyo ngwa mu Komiti ya Munthavi ya Zimbabwe, wakafumiska Baibolo lakuŵelengera pa intaneti la Mang’anamuliro gha Charu Chiphya Mateyu-Uvumbuzi mu Chitonga (Zimbabwe). Pulogiramu ya kufumiska Baibolo ili yikajambulikirathu ndipo ŵanthu pafupifupi 500 ŵakawonelera. Ghakuchita kupulinta ghambenge kusangika mu July 2022.

Chitonga chikuyowoyeka na ŵanthu ŵa mtundu wa Tonga awo ŵakukhala kumwera na kumanjiliro gha dazi kwa Zambia kweniso kumpoto kwa Zimbabwe. Baibolo la Malemba Ghakupatulika mu Mang’anamuliro gha Charu Chiphya likafumiskika mu Chitonga (chiyowoyero chakuyanako waka icho chikuyowoyeka ku Zambia) mu 2014. Aka nkhakwamba kuti Baibolo ling’anamulike na kufumiskika mu Chitonga (Zimbabwe).

Pambere Baibolo ili lindafumiskike, ŵanthu awo ŵakuyowoya Chitonga (Zimbabwe) ŵakagomezganga Mabaibolo gha Chitonga icho chikuyowoyeka ku Zambia.

Nangauli Chitonga cha ku Zambia na Chitonga cha ku (Zimbabwe) vikuyanako, kweni ng’anamuro la mazgu ghanyake likuŵa lakupambana chomene ku viyowoyero viŵiri ivi. Mwachiyelezgero, Baibolo la Chitonga cha ku Zambia la Mang’anamuliro gha Charu Chiphya Mateyu-Uvumbuzi, lemba la 1 Yohane 3:17 likuti Mkhristu wakwenera kulengera lusungu mubali wake uyo “wakusoŵa pakukora.” Ndipouli, mu Chitonga cha ku (Zimbabwe), mazgu agha ghangang’anamura mubali wako uyo “mutu ukukora makora yayi.” Awo ŵakachitanga mulimo wa kung’anamura ŵakasintha mazgu agho ŵakagwiliskira ntchito kuti ŵawovwire ŵanthu awo ŵakuyowoya Chitonga cha ku (Zimbabwe) kupulika ng’anamuro leneko.

Munyake uyo wakang’anamurako wakati: “Kumasinda uku, para nkhupharazga nkhamaliranga nyengo yinandi pa kulongosora ng’anamuro la mazgu agho ghali pa vesi kwa mweneko wa nyumba. Pasono nkhuŵerenga waka vesi ndipo munthu wakusuzgikaso yayi kuti wapulikiske ivyo Mazgu gha Chiuta ghakuyowoya.”

Tikukondwa lumoza na ŵabali na ŵadumbu ŵithu awo ŵakuyowoya Chitonga cha ku (Zimbabwe) apo ŵakugwiliskira ntchito Baibolo liphya ili pakovwira ŵanthu ŵanandi ŵa mitima yakwenelera kumanya “nthowa ya umoyo.”—Salimo 16:11.