Pa September 29, 2022, Khoti Likuru la Zimbabwe ku Mutare likaŵikira kumanyuma Mubali Tobias Gabaza, Wonder Muposheri, na Jabulani Sithole, awo ŵakaŵachitira vinthu vyambura urunji chifukwa chakuti ŵakakana kuchitako vinthu vya chisopa ivyo vikasuskananga na njuŵi zawo.

Mu October 2020, ŵabali ŵatatu aŵa ŵakachemeka panthazi pa khoti ilo likadangilirikanga na fumu ya muzi uwo ŵakakhalanga. Ivi vikachitika pamanyuma pakuti wamazaza munyake waŵachichizga kuti ŵachiteko mitheto yinyake. Mitheto iyi yikasazgangapo kuyowoyeskana na mizimu ya ŵakufwa kuti ŵacheme vula, ndipo munthu waliyose mu muzi wakwenera kuchitako. Pakulondezga njuŵi yawo yakusambizgika Baibolo, ŵabali ŵithu aŵa ŵakakana kuchitako vinthu ivi.

Fumu ya muzi uwu yikati ŵabali ŵithu mbakubuda ndipo yikayezga kuŵachichizga kuti nawo ŵachiteko waka mitheto iyi. Ŵabali ŵithu ŵakasankha kukachita apilu nkhani iyi ku Khoti Likuru ku Chipinge.

Pa January 5, 2021, Khoti Likuru likaŵikira kumasinda ŵabali ŵithu. Ndipouli, ŵalara ŵa muzi ŵakakana kupulikira ivyo khoti likadumura ndipo ŵakalutilira kuŵachichizga ŵabali ŵithu. Nakuti ŵanyake ŵakafika m’paka pa kwamba kuŵagega na kuŵachitira nkhaza ŵabali aŵa.

Ŵabali ŵithu ŵati ŵawona kuti ivi vikulutilira, ŵakachita apilu ku Khoti Likuru Chomene. Khoti likati ŵalara ŵa muzi ŵakabuda ndipo ŵakaswa wanangwa wa ŵabali aŵa. Likatiso ŵalara ŵa muzi aŵa ŵaleke kuŵachichizga ŵabali ŵithu kuchita mitheto iyo yikususkana na njuŵi yawo kweniso ŵaŵalipire ŵabali aŵa.

Tikugomezga kuti chigamuro ichi chiwovwirenge chomene ŵabali na ŵadumbu ŵithu ŵa ku Zimbabwe, chifukwa mitheto iyi yikuchitika mu charu chose ichi. Tikuwonga chomene Yehova chifukwa cha kutovwira kuti vitiyendere makora pa mulandu uwu.—Zintharika 2:8.