Chiwoneskero cha malonda cha pa charu chose ku Zimbabwe (ZITF) chikachitika ku Bulawayo, Zimbabwe, kufuma pa April 25 m’paka 29, 2023. Chiwoneskero cha ZITF ntchimoza mwa viwoneskero vikuru chomene mu charu ichi, ndipo kukiza ŵanthu 500 kufuma mu vyaru 22 ndipo ŵanthu awo ŵakiza ŵakujumpha 60,000 ŵakakopeka na chiwoneskero ichi. Ŵakaboni ŵa Yehova ŵakachitako chiwoneskero ichi pa chigaŵa cha masambiro na kusambizga.

Kuti ŵawoneske ŵanthu ŵanandi ŵakufuma mu vyaru vinyake awo ŵakiza pa ungano uwu, mabuku ghakulongosora Baibolo ghakaŵikika mu viyowoyero 10, kusazgapo Chiyowoyero cha Mawoko cha ku Zimbabwe. Kweniso pakapangika manozgero ghakusambira Baibolo na ŵanthu ŵakunweka. Paumaliro wa ungano uwu, mabuku ghakulongosora Baibolo ghakujumpha 12,000 ghakagaŵirika ndipo ŵanthu ŵakujumpha 450 ŵakapempha kuti Ŵakaboni ŵa Yehova ŵaŵayenderenge. Mudumbu Eucebiah Mukura, uyo wakatawuzganga ŵalendo pa kanyumba ka mabuku wakayowoya kuti: “Ŵanthu ŵanandi ŵakazomera kuti ŵasambirenge Baibolo kwaulere. Chikaŵa chakukondweska chomene kuti ŵanthu ŵanandi ŵakayowoyanga kuti mbakunweka chomene kuti Ŵakaboni ŵa Yehova ŵazakaŵayendere.”

Pa kanyumba ka mabuku aka pakaŵaso Baibolo la Malemba Ghakupatulika mu Mang’anamuliro gha Charu Chiphya. Mwanakazi munyake wakati wapulika munthu munyake uyo wakaŵazganga mwakukwezga kufuma mu Baibolo ili mu chiyowoyero cha Chindebele, wakakondwa chomene kuwona kuti likaŵa lakupulikikwa makora ndipo wakapempha kuti nayo waŵe nalo Baibolo ili. Msungwana munyake mwakukondwa wakalongora mudumbu withu kuti waŵika pulogiramu ya JW Library mu foni yake. Iyo wakati wakachita nthena na chilato chakuti nayo waŵe nalo Baibolo liphya la Mang’anamuliro gha Charu Chiphya.

Mudumbu Gillian Ellerman uyo wakawovwiranga ŵalendo wakati: “Ivyo vikachitikanga vikaŵa vyakukondweska chomene. Ŵanthu ŵakizanga kwambura kuleka pa kanyumba ka mabuku aka. Yehova wakalumbika chomene!”

Ntchakukhozga chomene kuwona kuti ŵabali na ŵadumbu ŵithu ku Zimbabwe ŵakugwiliskira ntchito mwaŵi uliwose kuti ŵanji “ŵamanye makora unenesko.”—1 Timote 2:4.