Kukwambilira kwa chaka ichi, ofesi ya munthavi ya ku Zimbabwe yikapokera makalata ghakuwonga kufuma ku mabungwe ghaŵiri agho ghakumanyikwa makora mu charu ichi. Lakwamba kufuma ku Dorothy Duncan Centre for the Blind and Physically Handicapped ndipo lachiŵiri kufuma ku Yunivesite ya Zimbabwe. Mabungwe agha ghakalemba makalata kuwonga ofesi ya munthavi chifukwa cha chawanangwa icho ŵakapokera. Ofesi ya munthavi yikapeleka Mabaibolo gha Malemba Ghakupatulika mu Mang’anamuliro gha Charu Chiphya, kweniso mabuku ghanyake ghakulongosora Baibolo mu vilembo vya ŵanthu ŵambura kuwona (braille). Yunivesite ya Zimbabwe yikalemba kuti: “Mabuku agho mwatipa ghatovwirenge pakusambizgira ŵana ŵithu ŵa sukulu kuti ŵasinthe na kuŵa na nkharo ziwemi. Mukovwira ŵanthu ŵanandi ndipo tikumuwongani chomene.”

Wovwiri wa mabuku agho ofesi ya munthavi yikapeleka ntchimoza mwa vinthu ivyo ofesi iyi yachita mwasonosono, na chilato chakuti ŵafikire ŵanthu ŵachibulumutira ŵakujumpha 10,000 kweniso awo ŵakusuzgikira kuwona ku Zimbabwe. Mu 2017, ofesi ya munthavi yikanozga upharazgi wapadera ku ŵachibulumutira na awo ŵakusuzgikira kuwona. Ofesi ya munthavi yikatuma mabanja ghaŵiri gha ŵapayiniya ŵapadera na chilato chakuti ŵawovwire ŵapharazgi kuti ŵafikire ŵanthu ŵanandi. Ntheura kufika pasono pali masambiro gha Baibolo 46 agho ghakuchitika ndipo ŵanthu ŵanyake ŵatatu ŵali kubatizika.

Munyake uyo wali kubatizika ni Mudumbu Mavies Chaya. Wakamba kusambira Baibolo mu 2021 kwizira pa upharazgi wa pa telefoni. Kumanyuma Mavies wakalutako ku ŵamapemphero na chilato chakuti ŵakamuchizge maso kweni wakaleka kuŵagomezga chifukwa ŵakatondeka kumuchizga. Kweni wati wasambira ivyo Baibolo likulayizga vyakuti ŵachibulumutira ŵazamulaŵiska mu charu chiphya, chipulikano chake chikaŵa chankhongono chomene. Ntheura wakamba kusambira Baibolo kaŵiri pa sabata ndipo wakabatizika mu April 2022.

Apo tikulindilira nyengo iyo Yehova wazamujura maso gha ŵachibulumutira, tikukondwa kuwona kuti pasono wakupeleka ‘ungweru na kupulikiska vinthu’ ku wose awo ŵakumupenja.—Salimo 119:130.