Ao. E atafai te Atua ki ana tavini kolā e ma‵saki. Ne fai mai te Tusi Tapu e uiga ki tena tavini fakamaoni: “Ka tausi ne Ieova a ia i luga i te moega e masaki ei a ia.” (Salamo 41:3) Kafai ko fepaki mo se masaki tumau, ka aoga eiloa a auala e tolu konei ki a koe:

1.   ‵Talo ke maua te malosi ke kufaki. E mafai o maua ne koe “te filemu o te Atua telā e sili fakafia atu i mea katoa kolā e malamalama i ei a tino,” kae ka fai ei ke mo a ma manavase malosi koe kae ke tumau koe faitalia a tulaga faiga‵ta.​—Filipi 4:6, 7.

2.   Ke maua se kilokiloga ‵lei. E fai mai te Tusi Tapu: “Kafai koe e matafiafia faeloa, kae ka tumau te malosi i a koe. Kafai koe e fanoanoa faeloa kae pili mai te mate.” (Faataoto 17:22, Tusi Tapu, Tuvalu) Fakatumau ou uiga fai fa‵kata me ka fai ei ke fiafia koe i taimi faiga‵ta kae aoga foki ki tou ola ‵lei.

3.   Fakamalosi tou fakamoemoega mō aso mai mua. A te fakamoemoega ‵lei mō aso mai mua ka fesoasoani atu ke fiafia koe faitalia tou masaki tumau. (Loma 12:12) Ne ‵valo mai te Tusi Tapu me ka isi se taimi “ka seai se tino e fai aka: ‘Au ko masaki.’” (Isaia 33:24) Tenā te taimi ka faka‵lei ne te Atua a masaki tumau katoa kolā e se mafai o faka‵lei aka ne poto ‵fou fakasaienisi i aso nei. E pelā mo te fakamatalaga i te Tusi Tapu, e fai mai penei e uiga ki te auala ka toe liu talavou ei a tino: “Fai tena foitino ke malosi atu i lō te taimi koi talavou ei; fai ke toe foki a ia ki aso ne maua ei ne ia te malosi fakatalavou.”​—Iopu 33:25.

 Masaua: E tiga loa e talia ne Molimau a Ieova a te fesoasoani mai te Atua, e ‵sala foki latou ki togafiti mai te fakaimasaki mō masaki tumau. (Maleko 2:17) E se fakamalosi ne matou i konei so se togafiti fakatokita, e tali‵tonu matou me e ‵tau mo tino taki tokotasi o fai ana fakaikuga mō tena ola ‵lei eiloa.