A latou kolā ne papatiso e pelā me ne Molimau a Ieova, kae ko se toe talai atu ki nisi tino, kāti ko tapea‵pea atu latou mai te ‵kau fakatasi mo taina tali‵tonu, e se fakapuli katoatoa atu latou. A te ‵tonuga loa, e taumafai matou ke oko atu ki a latou ke toe fakamalosi aka te lotou fia‵fia i te feitu faka-te-agaga.

 E se fakatea fakavave ne matou se tino telā ne fai ne ia se agasala matagā. Kae kafai e ‵teke atu faeloa se Molimau papatiso ki tulaga i te Tusi Tapu i mea tau amioga kae e se salamō, ka mafai o fakapuli io me e fakatea a ia. E fakaasi manino mai penei i te Tusi Tapu: “Tapale kea‵tea mai i a koutou a te tagata masei tenā.”—1 Kolinito 5:13.

 Kae e a māfai ko fakatea se tagata kae ko tena avaga mo ana tama‵liki koi fai mo fai ne Molimau a Ieova? A fesokotakiga i mea fakalotu katoa mo tena kāiga ko ‵fuli, kae tumau eiloa olotou fesokotakiga faka-te-foitino katoa. A fesokotakiga i te avaga mo te fakaasiatuga o te alofa mo faifaiga masani i loto i te kāiga, e tumau eiloa.

 E mafai ne tino faka‵tea o ‵kau mai ki fakatasiga. Kae kafai e ma‵nako latou ki ei, e mafai foki o maua ne latou a pati fakatonutonu faka-te-agaga mai i toeaina i te fakapotopotoga. A te fakamoemoega ko te fesoasoani atu ki a latou taki tokotasi ke mafai o toe fetaui ‵lei latou ke fai mo fai ne Molimau a Ieova. A tino faka‵tea kolā e ‵teke atu ne latou a amioga sē ‵lei kae fakaasi atu a te loto fakamaoni ke ola e ‵tusa mo tulaga i te Tusi Tapu, e mafai eiloa o talia latou ke toe fai mo fai ne Molimau a Ieova.