E pelā me ne Molimau a Ieova, e ga‵lue matou ke ati aka omotou kāiga, penā foki mo kāiga a omotou tuakoi. E āva matou ki te Atua e pelā me ko te Mafuaga o kāiga. (Kenese 2:​21-​24; Efeso 3:​14, 15) I te Tusi Tapu, e akoako mai ne ia a akoakoga fakavae kolā ne fesoasoani atu ki tino i te lalolagi kātoa ke fakamalosi aka kae fakatumau te fiafia i olotou olaga avaga.

 E fai ne matou te ‵toe mea e mafai o fai ke tau‵tali atu ki pati fakatonutonu i te Tusi Tapu me e fesoasoani mai ke momea aka te motou ‵lei pelā me ne avaga tāgata, avaga fāfine, mo mātua. (Faataoto 31:10-​31; Efeso 5:22–​6:4; 1 Timoteo 5:8) A te poto e maua i te Tusi Tapu e fesoasoani atu foki ke manuia a kāiga kolā e kese‵kese a talitonuga o tino i ei. (1 Petelu 3:​1, 2) Mafaufau ki nisi pati konei mai i a latou kolā e se ne Molimau kae ko olotou avaga ne Molimau a Ieova:

•   “A te ono tausaga muamua o te ma olaga avaga ne ‵fonu eiloa i kinauga mo mea fakafi‵ta. Kae mai tua o te faiga o Ivete mo fai se Molimau a Ieova, ne momea aka te loto alofa mo te kufaki o tou fafine. A ‵fuliga kolā ne fai ne ia, ne fakatumau aka ei te ma avaga.”​—Clauir, mai Brazil.

•   “Ne ‵teke atu au ki taku avaga, ko Chansa, i te taimi ne kamata ei o sukesuke tou tagata ki te Tusi Tapu mo Molimau a Ieova, me ne mafaufau au me i a latou ne tino ofa kāiga. Talu mai te taimi tenā, ne kamata o lavea ne au me ne fesoasoani tonu mai te Tusi Tapu ki te ma olaga avaga.”​—Agness, mai Zambia.

 I te motou galuega talai, e fakaasi atu ne matou ki omotou tuakoi, me kafai e fakagalue aka te poto i te Tusi Tapu, e mafai o fesoasoani atu ki a latou ke

•   Filifili mo te poto se avaga ‵lei

•   Manumalo i te tausaga muamua o te fakaipoipoga

•   Iloa o fakafesagai faka‵lei atu ki mātua o te avaga

•   Fakaaoga faka‵lei a tupe

•   Fakagata te kinau

•   Fakamasani ki te fakatau fakamagalo

•   Akoako a tama‵liki

 A te ‵tonuga loa, e fai penā i nisi taimi. E pelā mo te lipoti mai i se kamupane fai sukesukega i te 1998, ko te Sofres, ne iloa aka ne latou me e 1 mai te toko 20 o avaga kolā e fai se tokotasi i ei mo fai se Molimau ne fe‵paki mo fakalavelave faiga‵ta i te taimi ne ‵fuli ei te tokotasi tenā.

 Ne ‵valo mai ne Iesu me i a latou kolā e tau‵tali ki ana akoakoga ka logo‵mae i nisi taimi i fakalavelave i te kāiga. (Mataio 10:32-​36) Ne lavea ne te tino tusitala ko Will Durant me mai lalo i te Emupaea o Loma, “ne ‵losi atu me i te lotu Kelisiano ne tino ofa kāiga,” a kae ne fe‵paki foki a nisi Molimau a Ieova i aso nei mo te ‵losiga tenā. Kae e mata, e fakauiga i ei me i te Molimau ko te pogai o te fakalavelave tenā?

 I te taimi ne fai ei te fakaikuga ki te ‵losiga me i Molimau a Ieova ne tino ofa kāiga, ne fai mai a te European Court of Human Rights me ko kāiga sē Molimau kolā e masani sāle o faka‵tupu ne latou a kinauga mai te ita fitifiti “ke talia kae āva ki te saolotoga a olotou kāiga ke fakaasi kae fakagalue aka olotou lotu.” Ne toe fai mai a te fono tenā: “E masani sāle o ‵tupu a vaegā fakalavelave penei i taki tauavaga kolā e kese‵kese lā lotu kae e se ‵sao foki a Molimau a Ieova i ei.” b Kafai foki loa e fe‵paki mo ‵tekemaiga i mea tau lotu, e taumafai a Molimau a Ieova ke tau‵tali atu ki pati fakatonutonu i te Tusi Tapu: “Sa taui atu te masei ki te masei. . . . Fai te mea e mafai o fai ne koutou ke tausi te filemu i te va o koutou mo tino katoa.”​—Loma 12:17, 18.

 E faka‵logo a Molimau ki te fakatonuga i te Tusi Tapu “ke avaga fua i te Aliki,” ko tena uiga, ke avaga ki se tino telā e ‵pau lā talitonuga. (1 Kolinito 7:​39) E maua te fakatonuga tenei i te Tusi Tapu kae aoga foki. E pelā mo se mataupu i te Journal of Marriage and Family i te 2010, ne fai mai me “i tauavaga kolā e ‵pau lā lotu, faifaiga, mo talitonuga” e sili fakafia atu te ‵gali olotou fesokotakiga. c

 Kae e se fakamalosi atu a te kau Molimau ki olotou tino ‵lotu ke ‵vae kea‵tea mai i se avaga telā e sē se Molimau. E fai mai te Tusi Tapu: “Kafai se taina e avaga ki se fafine sē talitonu kae e lotomalie tou fafine ke ‵nofo fakatasi lāua, ke se tiaki la ne ia te fafine tenā; kae kafai se fafine e avaga ki se tagata sē talitonu, kae e lotomalie tou tagata ke ‵nofo fakatasi lāua, ke se tiaki la ne te fafine tena avaga.” (1 Kolinito 7:​12, 13) E faka‵logo eiloa a Molimau a Ieova ki te fakatonuga tenei.