Ko oti eiloa ne fakaaoga ne Molimau a Ieova a ‵fuliga kese‵kese i olotou sukesukega ki te Tusi Tapu. Kae e fakatāua malosi ne matou a Te Tusi Tapu i te ‵Fuliga o te Lalolagi Fou, i ‵gana kolā e avanoa i ei, me e fakaaoga i ei a te igoa o te Atua, e tonu kae manino ‵lei foki te ‵fuliga.

•   E Fakaaoga i ei te Igoa o te Atua. E fakata‵mala a nisi tino ‵lomi o te Tusi Tapu ke tuku atu a tavaega ki te tino e ‵tau ki ei. E pelā mo se ‵fuliga e tasi o te Tusi Tapu, ne tusi mai i ei a igoa o tino e sili atu i te toko 70 kolā ne fesoasoani atu ki te fakatokaga mo te ‵lomiga. Kae i te Tusi Tapu foki loa tenā, ne tapale katoatoa keatea ne latou mai i ei a te igoa o te Tino ne aumai ne ia​—ko Ieova te Atua!

   E ‵kese mai i ei, a te ‵Fuliga o te Lalolagi Fou, ne toe fakafoki atu te igoa o te Atua ki te fia afe o koga kolā ne maua i ei i te ‵kopi muamua, kae ne seki tusi i ei a igoa o tino kolā ne aofia i te komiti mō te ‵fuliga tenā.

•   E Tonu te ‵Fuliga. E se ko ‵fuliga katoa ne ‵fuli tonu mai ne latou a te fekau tonu i te Tusi Tapu. E pelā mo te ‵fuliga e tasi, e ‵fuli i ei a te Mataio 7:​13, penei: “Ulu atu ki te mataloa mataliki me i te mataloa ki te afi i seoli e lauefa kae e faigofie a te auala e iku atu ki ei.” Kae ko te fuaiupu tenā i te ‵gana muamua ne tusi i ei, ne fakaaoga a te tugapati ko te “fakaseaiga,” kae e se ko te “afi i seoli.” Kāti a tino ‵fulitusi ne fakaaoga ne latou a te pati “te afi i seoli” ona ko te mea ne tali‵tonu latou me i tino amio ma‵sei ka fakapuapuaga i te afi i seoli ki te se-gata-mai. Kae ko te manatu tenā e se ‵lago ki ei te Tusi Tapu. Tela la, ne ‵fuli tonu eiloa te manatu tenā i te ‵Fuliga o te Lalolagi Fou, penei: “Ulu atu koutou ki te mataloa mataliki me e lauefa te mataloa kae saosao te auala telā e tau atu ki te fakaseaiga.”

•   E Manino ‵Lei te ‵Fuliga. A te ‵fuliga ‵lei e se ‵tau fua o tonu kae e ‵tau foki o manino ‵lei, telā e faigofie ke malamalama i ei. Mafaufau ki se fakaakoakoga e tasi. I te Loma 12:11, ne fakaaoga ne te apositolo Kelisiano ko Paulo, se tugapati telā e fakauiga tonu penei “ki te agaga telā e punapuna.” Ona ko te tugapati tenā e se maina ‵lei i ei a tino i te ‵gana Palagi i aso nei, ne ‵fuli i te Tusi Tapu i te ‵Fuliga o te Lalolagi Fou a te fuaiupu tenei i se auala telā e faigofie ke malamalama i ei. E fai mai i ei me i Kelisiano e ‵tau o ‘faka‵fonu ki te agaga tapu.’

 I tafa o te fakaaogaga o te igoa o te Atua, te ‵tonu, mo te manino ‵lei o te ‵fuliga i ei, e isi foki se mea e ‵kese ei a te ‵Fuliga o te Lalolagi Fou: Ne tufatufa atu e aunoa mo se ‵togi. Tenā ko mafai ei o maua ne te fia miliona o tino se Tusi Tapu i olotou ‵gana eiloa, ke oko ki tino kolā ne seki mafai o ‵togi ne latou se Tusi Tapu.