I te lalolagi kātoa, e uke a atufenua ko mavae‵vae ona ko mea fakapolitiki. E ‵tusa mo se savea a te Pew Research Center i te 2022, “ko silia atu mo te 65% o tino i fenua e 19 kolā ne fai ei te savea e fai mai me ko ma‵losi ‵ki a kinauga i olotou fenua i va o tino kolā e ‵lago atu ki potukau fakapolitiki kese‵kese e uke.”

 E mata, ko lavea ne koe a te lasi o te mavae‵vae o tino i te koga e nofo koe i ei ona ko mea fakapolitiki? Kaia ko tupu ei te mea tenā? E mata, e isi se faka‵leiga ki ei? Onoono la ki pati a te Tusi Tapu.

 Ko leva ne ‵valo mai i te Tusi Tapu mai i te vaitaimi tenei, telā ne fakasino atu e pelā me ko “aso fakaoti,” e tokouke a tino ka fakaasi atu ne latou a uiga kolā ka se mafai o maua mai ei se fealofani.

•   “Ka oko mai eiloa a toe taimi faiga‵ta i aso fakaoti. Me i tino ka a‵lofa fua ki a latou eiloa, . . . e se lotoma‵lie ki so se feagaiga.”—2 Timoteo 3:1-3.

 E tiga eiloa e tokouke a tino e ga‵lue malosi ke maua ne malo a te manuia, kae e se mafai eiloa. E faigata ki tino kolā e ‵nofo mo kilokiloga ‵teke ke ga‵lue fakatasi o faka‵lei aka a fakalavelave. Ko leva eiloa ne fakamaoni mai i te Tusi Tapu a ikuga konā.

•   “Ne pule ei te suā tagata ki te suā tagata kae logo‵mae i ei.”—Failauga 8:9.

 Kae e fakaasi mai i te Tusi Tapu a te faka‵leiga ki ei—se malo telā e ‵taki ne se tino telā e mafai o fakaseai ne ia a fakalavelave kolā e logo‵mae i ei a tino i aso nei.

 E fakamatala mai i te Tusi Tapu se takitaki tu ‵kese telā e mafai ne ia o faka‵lei a fakalavelave konei: Ko Iesu Keliso. E maua ne Iesu a te malosi, te pule mo te manakoga ke aumai a te fealofani mo te filemu ki luga i tino katoa.

•    “I ana aso a tino amio‵tonu ka lauolaola, kae ka lasi te filemu.”—Salamo 72:7.

•   “Atufenua katoa ka tavini atu ki a ia.”—Salamo 72:11.

 A Iesu se takitaki ‵lei katoatoa me e atafai kae manako a ia o fesoasoani ki tino, maise loa a latou kolā ne fai fakamasei ne tino.

•   “Ka fakasao ne ia te tino mativa telā e tagi mō se fesoasoani, e pelā foki mo te tino malalo mo so se tino e seai sena fesoasoani. Ka alofa a ia ki tino ma‵lalo mo tino ma‵tiva, kae ka fakaola ne ia a tino ma‵tiva. Ka faka‵sao ne ia latou mai pulega fakasaua mo fakasauaga.”—Salamo 72:12-14.

 Tauloto ki mea e uke e uiga ki te Malo o te Atua, te pulega faka-te-lagi telā e takitaki ne Iesu. ‵Sala atu ki te auala e mafai ei o maua ne koe a mea aoga kae ‵lago atu ki tena pulega.

•   Onoono ki te vitio tenei Se a te Malo o te Atua?

•   Faitau ki te mataupu “Te Malo o te Atua—Se Pulega e Aunoa mo Faifaiga sē Fakamaoni.”