I a Ianuali 24, 2023, ne fakamakini aka ne saienitisi a te taimi i te Itula o te Gataga a ke tai pili atu ki te valuapo, telā e fakasino ki te gataga o te lalolagi.

•   “A te taimi i te ‘Itula o te Gataga’ telā e fakasino ki fakalavelave fakama‵taku e fai ne tino kolā e fakapuapuaga foki loa i ei latou ko oti ne fakamakini ke tai pili atu ki te valuapo i te Aso Lua ona ko te taua i Ukraine, taua fakaniukelea mo te fakamataku o te mafulifuliga o tau o aso.”—AFP International Text Wire.

•   “Ne fakaasi mai ne saienitisi me i te Aso Lua ko oti ne fakamakini aka a te taimi i te ‘Itula o te Gataga’ ki se 90 sekone mai mua o te valuapo—telā ko te ‵toe tulaga pili eiloa o tino ki amaketo.”—Tala i te ABC.

•   “Ko oti ne faka‵pula mai ne se potukau o saienitisi i te lalolagi kātoa me ko sili atu nei i te fakamataku te tulaga o tino i te vaitaimi nei i lō taimi mua.”—The Guardian.

 E mata, ko pili mai eiloa te gataga o tino mo te ‵tou paneta? E mata, e ‵tau o ma‵taku tatou ki mea ka ‵tupu i aso mai mua? Ne a pati a te Tusi Tapu?

 E fai mai te Tusi Tapu me i “te lalolagi e tumau eiloa ki te se-gata-mai” kae ka isi ne tino kolā “ka ‵nofo . . . i ei ki te se-gata-mai.” (Failauga 1:4; Salamo 37:29) Tela la, e se mafai ne tino o fakamasei te lalolagi io me fai ne latou ke se mafai o ola a tino i te paneta kātoa.

 Kae e faipati te Tusi Tapu e uiga ki te gataga. E pelā me se fakaakoakoga e fai mai i ei me “ka fakaseai atu te lalolagi.”—1 Ioane 2:17.

•   Ke malamalama tatou i te uiga o pati i te Tusi Tapu māfai ko faipati ki te gataga o te lalolagi, faitau ki te mataupu “Is the World Coming to an End? What Is the Apocalypse?”

•   Ke tauloto e uiga ki pati a te Tusi Tapu ki te taimi ka ‵tupu ei a mea i te lalolagi i aso mai mua, faitau ki te mataupu “When Will the World End?”

 E mafai o fesoasoani mai te Tusi Tapu ke fakatumau ne tatou se kilokiloga ‵lei faitalia a fakalavelave ‵tupu i te lalolagi i aso nei. E pefea la?

•   E maua i te Tusi Tapu a manatu aoga. (2 Timoteo 3:16, 17) E pelā me se fakaakoakoga, faitau ki te mataupu “How to Control Worry” ke lavea ne koe te auala e mafai o fesoasoani atu te Tusi Tapu ke fakatumau se kilokiloga ‵lei faitalia a fakalavelave ‵tupu i te olaga.

•   E tuku mai i te Tusi Tapu se fakamoemoega mautinoa i aso mai mua. (Loma 15:4) E fakamatala faka‵lei mai i ei a mea e fakamoe‵moe tatou ke ‵tupu i aso nei mo aso mai mua, kolā ka fesoasoani mai ke tumau te ‵tou loto tali‵tonu faitalia a fakalavelave e ‵tupu i te lalolagi nei.

 Ke maua ne koe a toe mea aoga mai te Tusi Tapu, e ‵kami ne matou koe ke tofotofo ki te faiga o se akoga faka-te-Tusi Tapu sē ‵togi i te aso nei.